По кој знае кој пат е одложено судското рочиште за случајот на Специјалното јавно обвинителство „Талир“ кој се однесува на финансирањето на партијата ВМРО-ДПМНЕ. Причина за денешното одложување е операцијата на обвинетитот Леко Ристовски, поради која беше одложено и вчерашното рочиште за предметот „Титаник“.

Адвокатот Дончо Наков денеска до судот достави писмо од Собранието за толкувањето на Законот за СЈО во кое се вели дека не е започната процедура за толкување од причина што Владата сѐ уште нема испратено мислење до Собранието уште од 13 февруари годинава од кога и е испратено барањето. Наков напомена дека ќе испрати барање за ургенција на Владата за побрзо да се реши ова прашање.

Првото рочиште за „Талир“ беше закажано на 18 февруари и беше одложено заради отсуството на обвинетиот Илија Димовски. Тој тогаш го известил судот дека како шеф на собраниската делегација на Парламентарното собрание на НАТО, учествува на состанок во Брисел.

Потоа следуваат нови одложувања од најразлични причини, болест и службени патување на некој од обвинетите, како и отсуство на адвокати од одбраната.

Во предметот „Талир” обвинетите одговараат за злоупотреба на службената положба и перење пари. Според СЈО, незаконски прибавиле 4,5 милиони евра од приватни компании кои наместо во државниот буџет, се уплаќале на сметката на ВМРО-ДПМНЕ.

Обвинети се поранешниот премиер Никола Груевски, поранешниот генерален секретар на Владата, Кирил Божиновски, поранешниот министер за транспорт и врски, Миле Јанакиески, пратеникот Илија Димовски и Леко Ристоски. За случајот обвинета беше и Елизабета Чингаровска која ја призна вината и доби условна казна.