Владата на Талибанците во Авганистан денес го отфрли барањето на американскиот претседател Доналд Трамп за враќање на воздухопловната база Баграм, четири години по хаотичното повлекување на Америка од Авганистан, кое го остави огромниот воен објект во нивни раце, јавува АП.

Главниот портпарол на Талибанците, Забихула Муџахид, го отфрли повикот на Трамп и ги повика САД да усвојат политика на „реализам и рационалност“.

Авганистан има економски ориентирана надворешна политика и се стреми кон конструктивни односи со сите земји врз основа на меѓусебни и заеднички интереси, рече Муџахид во објава на платформата X.

„Треба да се потсетиме дека, според Договорот од Доха, САД се обврзаа да не користат или да не се закануваат со сила против територијалниот интегритет или политичката независност на Авганистан, ниту да се мешаат во неговите внатрешни работи“, рече Муџахид.

Тој рече дека САД мора да останат верни на своите обврски.

Трамп претходно денес изјави дека „лоши работи ќе се случат“ во Авганистан ако таа земја не ја врати воздухопловната база Баграм на САД.

„Ако Авганистан не ја врати воздухопловната база Баграм на оние што ја изградија, а тоа се САД, лоши работи ќе се случат“, рече Трамп во објава на неговата социјална мрежа Truth Social.

Претходно, Трамп рече дека разговарал со властите во Авганистан за враќање на контролата врз воената база Баграм, клучен објект што го користеа американските сили за време на војната во таа земја.

Воздухопловната база Баграм, која се наоѓа северно од Кабул, беше најголемата американска воена инсталација во Авганистан и стратешка точка за воздушни и логистички операции за време на дведецениската војна.