Денес во светот пуши или на друг начин ужива во тутунот секој петти жител на планетата, додека во 2000 година секој трет човек бил зависник од никотин.

Трендот на опаѓање на уживањето во ова, по здравје погубно, задоволство продолжува, се наведува во извештајот на Светската здравствена организација (СЗО) за употребата на тутун во периодот од 2000 до 2030 година.

Во документот се нагласува дека минатата година 1,25 милијарди луѓе, постари од 15 години уживале во тутунските производи, додека на почетокот на векот во светот имало 1,34 милијарди корисници.

Проекциите укажуваат дека, и покрај зголемувањето на светската популација, бројот на зависници од тутун ќе се намали на 1,2 милијарди во 2030 година.

Во извештајот се наведува дека најголемиот број пушачи денес се лоцирани во Југоисточна Азија и Европа и дека бројот на зависници е близу една четвртина од вкупното население во тие простори, со назнака дека бројот на корисници на тутунски производи продолжува да се зголемува во Египет, Јордан и Индонезија.

Се наведува дека овој извештај е нецелосен и дека реалниот број на корисници на тутун во светот веројатно е многу поголем, бидејќи повеќе од 70 земји во светот не ги испратиле најновите податоци и информации за движењето на бројот на зависници.

Светската здравствена организација, и покрај достапните податоци кои покажуваат пад на бројот на пушачи, предупредува дека глобалната смртност од оваа штетна навика ќе остане на приближно исто ниво.

Секоја година, се додава, осум милиони луѓе во светот умираат како резултат на консумирање тутун, како и 1,3 милиони непушачи, кои се изложени на чад од тутун.