Светската здравствена организација (СЗО) соопшти дека минатонеделните разорни земјотреси во Сирија и Турција, во кои според последните податоци загинаа повеќе од 41.000 луѓе, се најголемата природна катастрофа во европскиот регион во последните 100 години.

„Сведоци сме на најлошата природна катастрофа во европскиот регион на СЗО во минатиот век и сè уште учиме за нејзините размери“, рече за новинарите Ханс Клуге, регионален директор на СЗО за Европа, според „Политико“.

Европскиот регион на СЗО се состои од 53 земји вклучувајќи ја и Турција. Сирија е членка на соседниот источен медитерански регион на СЗО.

Клуге рече дека СЗО го започнала најголемото распоредување на тимови за медицинска помош во 75-годишната историја на Европскиот регион на СЗО. „Досега во Турција пристигнаа 22 екипи за итна медицинска помош“, посочи Клуге.

Во Сирија бројот на жртви речиси и не се менува веќе неколку дена, но се очекува нагло да се зголеми.

„Потребите се огромни, тие растат од час во час. На околу 26 милиони луѓе во двете земји им е потребна хуманитарна помош“, рече Клуге.