Граѓаните може да ја разгледаат содржината на новогодишната кошница на педесеттина домашни увозници и производители, од кои неколку се уште се думаат што да понудат, па не се претставиле на веб страницата „мојакошница.мк“ на Министерството за економија. За жал, освен КАМ и Тинекс, кои се меѓу првите маркети кои ја пласирале својата понуда, останатите 16 трговски синџири немаат производи. Министерот за економија и труд Бесар Дурмиши вчера напомена дека листата не е конечна и таа сукцесивно ќе се надополнува се до почетокот, но и за времетраењето на акцијата која почнува на 15 декември, а завршува на 15 јануари идната година.

Засега Бимилк нуди млеко трајно УХТ со масленост 2,8 отсто 1 литар, јогурт со масленост 2,8 отсто 1 кг и кисела павлака со масленост 20 отсто од 400 грама. Понудата за поевтини производи до 10 отсто, на пример на Фриком се однесува на палета замрзнат зеленчук од овошје со грамажа од 300 до 400, додека Бучен Козјак по намалени цени ќе понуди јогурт од 1 и 1,5 кг, кравјо бело сирење и урда од 1 кг. Листата на Пивара АД Скопје ги содржи нивните познати брендови безалкохолни пијалаци и пива во лименки од 500 грама, но пакувања од по 6. Тука се газираните води и сокови на Кожувчанка во пакети или на парче, а Виталиа понудила кранчи мусли чоко банана 600 гр, овесна каша малина 55 гр, гранола бар орев лешник 35 гр, рум бар урма смоква 30 гр и роу бар чиа какао 30 гр. Уште една пиварница – Прилепската доставила понуда од своите безалкохолни пијалаци и пиво, додека Кораб Трница нуди мешан кашкавал во вакум, кисела павлака со масленост 20% од 400 грама, јогурт со масленост 3,2 отсто  1 кг, свежо ситно сирење 450 грама и пилешка паштета со кашкавал од 50 грама.

Со своите програми се претставиле и Вива, Вемилк, Здравје Радово, Кола. Витаминка нуди пудинзи, супи, чоколади за јадење и за готвење и мајонез. Листата на Екстрамеин содржи стисната шунка 1,8 кг, деликатес шунка 1,8 кг, пилешки гради 1,8 кг и алпска салама од 700 грама. Везешари нуди јајца М класа 18/1, скараџиски колбас од говедско месо 450 гр и пилешка салама екстра 400 гр. Житолукс најавува поевтин бел леб ролован во фолија 470 гр, полубел леб ролован во фолија 470 гр, полубел леб во хартија 470 гр, бел леб традиционален роловаан во хартија 470 гр и брашно ВОДЕНИЧАР ТИП 400 од 1 кг. и 2 кг.

Римес пак издвоил чадено јунешко месо, чадена селска печеница, свинска шунка специјал, пикник шунка, илешка посебна и крањски колбас, додека Нелт има богата програма со брендирани чоколади, меѓу кои е Милка, но и капучино и сокови. Граѓаните ќе може да купат вино Кратошија 1 литар Тиквешко црвено БиБ 3 литри, Т’га за југ 0,75 литри. Компанијата Краш се решила за чоколадите Дорина кекс 80г 28/1 и ориз 220г 7/1, КРАШ експрес 400г 12/1, ментол бонбони 100г, ванилици 220г, наполитанка нугат 420г 12/1 и бисквитите петит бер 200г. Конзервната индустрија ВИПРО ги објавила ајварот Ројал 314 мл, слаткото од дуња 440 гр, лутеницата 370 мл и летниот пинџур благ 580 мл, МИК Свети Николе понудил стисната шунка, пилешки гради, чаден свински бут во вакум, чадена панцета рефус, и говедски траен колбас.

Иако беше најавено „Слободен печат“ на листата освен понудата на Перутнина Птуј не забележа други видови на месо. Ќе има и поевтин грав, кикирики печени солени 300 гр, слива без семка 200 гр, брусница 100 гр, пуканки, суво грозје црно и неутрална павлака, а тоа е содржано во понудата на Чезакомерц. Понудата на Тинекс се состои од разни грицки, а онаа на КАМ е побогата и во неа има разни производи, меѓу кои смрзнати печива, разни намази, павлака и вино.

 Поскапеа дел од производите кои не се на листата

Трговците брифираат дека изминатите дееттина дена масовно пристигнувале нови ценовници, така маслото за јадење стигна до 94 денари, а пакување од 10 јајца, наместо 77 сега се продава по 90 и 110 денари. Претходно поскапеа кафето, доматите, овчите кашкавали, дел од саламите. Министерот за економија и премиерот беа децидни дека доколку се покаже дека некои производители во изминатиот период ги зголемиле цените, имаат соодветни мерки со кои ќе ги заштитат граѓаните!?

Граѓаните велат дека подобро би било доколку кошницата е помала според обем но со вистински намалувања од 20 до 40 отсто. Инаку, Законот за заштита на потрошувачи дава можност за акциска продажба, а трговецот може да даде поповолна понуда од аспект на цена само на ограничен број на стоки или услуги, а не на сите стоки и услуги.
Овој период, согласно законот не може да биде подолг од 30 дена и трговецот стоките или услугите кои ги ставил на акциска продажба мора да јасно, видливо и читливо да ги означи.