Под покровителство на сопругата на кандидатот за претседател Стево Пендаровски,  Елизабета Ѓоргиевска, а по повод Денот на здравјето, денеска се организираше тркалезна маса на која учествуваа д-р Милена Стевановиќ,  Елена Ковачевска и група млади студенти од областа на медицината.

Фокусот на дискусијата беше насочен кон иднината на медицината, со особено внимание на менталното здравје на младите, можности за младите доктори во нашата држава, како и предизвиците кои се пред нив.

Ѓоргиевска го истакна значењето на менталното здравје кај младите, посочувајќи дека темелното разбирање и интеграција на оваа компонента во медицинското образование е клучно за развојот на целосно подготвени здравствени професионалци. Таа ја нагласи важноста од промовирање на свесноста и поддршката за менталното здравје, особено во контекст на стресот и притисокот со кои се соочуваат младите луѓе во нивното образование и различни фази на кариерата.

Како професор и доктор, ја имам привилегијата секој ден да работам со талентирани и посветени студенти. Тоа ми овозможува да бидам дел од нивното образование и развој, што е исклучително инспиративно и исполнувачки. Сепак, се соочувам со сериозен предизвик – голем број од моите најдобри студенти си заминуваат во странство во барање на подобри можности. Ова е проблем со кој мораме активно да се бориме, ангажирајќи се да создадеме подобри услови за нив овде, дома – посочи Ѓоргиевска околу одлевањето кадри.

Таа посочи дека како координатор на Еразмус програмата, веќе неколку години се обидува да обезбеди можности за нашите млади да искусат и учат од европските метрополи, со цел тие да ги пренесат своите стекнати знаења и вештини назад во земјава. и ги охрабри младите  земја. да ги искористат различните можности и стипендии што ги нудат Министерството за образование и наука и различни амбасади.

Младите студенти активно учествуваа во дискусијата, споделувајќи свои искуства и мислења за иднината на медицината и своето место во неа. Тие ја истакнаа потребата од поинклузивен пристап кон менталното здравје и подобрена поддршка во нивните образовни и професионални патеки.