Светска банка денеска ќе претстави нова методологија за процена на деловната клима во 180 земји во светот, откако срамните откритија за неправилности во податоците и фаворизирањето на Кина ја принудија да го прекине рангирањето на „Дуинг бизнис“ пред две години. Банката соопшти дека пилот-изданието на новото годишно рангирање, наречено „Бизнис реди“, ќе биде објавено во пролетта следната година и првично ќе опфати 54 земји во Азија, Латинска Америка, Европа, Блискиот Исток и Супсахарска Африка. Ќе има дополнителни извештаи во текот на следните две години кога ќе се вклучат нови земји, додека Банката ќе ја усоврши својата методологија и ќе го зајакне новиот проект, кој има за цел да им помогне на земјите да привлечат инвестиции и да ги подобрат нивните пазари на труд и продуктивност за да го забрзаат нејзиниот економски развој, пишува БТА.

„Бизнис реди“ го подобрува и го менува претходниот проект на Светска банка – „Дуинг бизнис“. Таа се заснова на побалансиран и потранспарентен пристап во процената на деловната и инвестициската клима во одредена земја, се вели во соопштението на банката. „Бизнис реди“ е подготвен во согласност со препораките од експерти на Светска банка, владите, приватниот сектор и претставници на граѓанското општество и за првпат ги вклучува правата на работниците во согласност со барањата на Меѓународната организација на трудот. Индексот исто така признава дека регулативата може да има позитивни страни.

Светска банка го отповика рангирањето на „Дуинг бизнис“ во септември 2021 година, повикувајќи се на внатрешна ревизија и независен преглед, според кој високи банкарски функционери вршеле притисок врз функционерите да ги променат податоците за да ја фаворизираат Кина. Констатирани се и проблеми со податоците, со што се подобри позицијата во рангирањето на голем број земји, меѓу кои Саудиска Арабија, Обединетите Арапски Емирати и Азербејџан.

„Слободен печат“ пред две години ги објави информациите на „Волстрит џурнал“ дека високото раководство на банката извршило притисок врз вработените да ги сменат податоците што влијаат на рангирањето на Кина и на други нации, а прстот се впери во тогашната извршна директорка на Светска банка, Кристалина Георгиева, сега управен директор на ММФ, како и претседателот на Светска банка Џим Јонг Ким.

Во 2020 година, во прилично студено соопштение, беше објавено дека во извештаите за 2018 и 2020 година имало некои неправилности, публикувани во октомври 2017 и во 2019 година, како и дека станува збор за Кина, Саудиска Арабија, ОАЕ, а се споменуваше и Азербејџан, за кои, како што се наведува, има сомневање дека некој од Светска банка можеби влијаел врз бодовите што тие ги добиле, а не се во согласност со нивната дефинирана методологија. Банката тогаш одлучи да спроведе внатрешна истрага за да утврди дали обвинувањата се точни.

Повеќе од 17 години од своето постоење, извештајот „Дуинг бизнис“ претставуваше вредна алатка за мерењето на трошоците за водење бизнис во земјите во светот. Индикаторите и методологијата не беа посебно дизајнирани за некоја земја, туку беа со цел да помогнат да се унапреди вкупната бизнис-клима. Низ годините, „Дуинг бизнис“ ги испитуваше реформите што го поттикнуваат или го спречуваат развивањето на бизнис-активностите. Истражувањето претставуваше збир на квантитативни индикатори за одредби и заштита на имотни права во 190 земји. Покриваше 12 аспекти на еден бизнис: почнување бизнис, добивање дозволи за градба, приклучок на електрична енергија, регистрирање имот, добивање кредит, заштита на малцински инвеститори, плаќање даноци, трговија, спроведување договори, справување со стечај, вработување и склучување договори со владата.

Според извештаите на „Дуинг бизнис“, Македонија беше на 30-то место според водење бизнис во 2015-та, во 2016-та скокна на 12-то, во 2017 година на 10-то, во 2018 беше 11-та. Во последниот извештај со 80,7 поени, Северна Македонија беше 17-та во светот според условите за водење бизнис.