Полицијата во Јужна Каролина организира потера по 43 мајмуни макаки што избегале од центар за медицински истражувања откако чуварот заборавил да ги заклучи кафезите.

Окружните власти ги предупредија граѓаните да ги чуваат затворени вратите и прозорците на своите домови и веднаш да пријават ако забележат мајмуни. Полицијата објави дека веќе е лоцирана главната група бегалци и дека ќе настојува да ги намами во стапици нудејќи им храна.

– Ве молиме не им се приближувајте на овие животни во никакви услови – предупреди полицијата.

За избеганите макаки е наведено дека се млади женки со тежина од околу 3 килограми.

– Тие се премали за да бидат предмет на тестирања и премлади за да пренесуваат болести – истакнала компанијата „Алфа џенесис“ од чии кафези избегале макаките.

Само седум од вкупно 50 мајмуни решиле да останат во кафезите.