Британскиот премиер Риши Сунак се извини во петокот, 7 јуни, што предвреме ги напушти комеморациите на годишнината од Денот Д во Франција за да направи телевизиско интервју за кампањата за општите избори во Обединетото Кралство. Опозициските политичари го обвинија Сунак за „целосно прекршување на должноста“ со прескокнување на големата меѓународна церемонија со колегите светски лидери во Нормандија во четвртокот.

Сунак присуствуваше на настан на британската влада пред да се врати дома и ја пропушти главната церемонија на плажата Омаха, на која присуствуваа францускиот претседател Емануел Макрон, американскиот претседател Џо Бајден и лидерот на Украина, Володимир Зеленски.

„По завршувањето на британскиот настан во Нормандија, се вратив назад во Обединетото Кралство“, рече Сунак во објавата на страницата на социјалните мрежи X. „По размислување, беше грешка што не останав подолго во Франција – и се извинувам. “

Главниот противник на Сунак на изборите, лидерот на лабуристите Кир Стармер, исто така присуствуваше и беше фотографиран како се среќава со Зеленски. Во објавата на X, Стармер рече дека му рекол на украинскиот претседател дека „нема да има промена во британската поддршка за Украина“ доколку тој стане следниот британски премиер.

Лабуристот Џонатан Ешворт го обвини Сунак дека им дава приоритет на „своите суетни ТВ настапи пред нашите ветерани“.

Ед Дејви, лидерот на помалата партија Либерал-демократи, рече дека Сунак „донесе срам“ во неговата канцеларија и „ја разочара нашата земја“.

„Крајна жртва“

Конзервативниот лидер Сунак во својот пост рече дека годишнината „треба да биде за оние кои ја направија крајната жртва.

„Последното нешто што сакам е комеморациите да бидат во сенка на политиката“, напиша тој. „Длабоко се грижам за ветераните и ми беше чест даго претставувам ОК на голем број настани во Портсмут и Франција во изминатите два дена и да се сретнам со оние кои се бореа толку храбро“.

Церемониите на Денот Д ја одбележаа 80-годишнината од започнувањето на операцијата „Оверлорд“ кога десетици илјади сојузнички трупи упаднаа на плажите на Нормандија во северна Франција на 6 јуни 1944 година. Огромната воена операција го отвори патот за ослободување на окупирана Франција и крајот на војната против нацистичка Германија.