На врховниот судија Наќе Георгиев му престана судиската функција, одлучи Судскиот совет откако тој доби тригодишна казна затвор за „примање награда за противзаконито влијание“.

Претседателката на Судскиот совет, Весна Дамева, на денешната седница кажа дека иако по ова утврдување на престанок на функција не се гласа и не треба расправа, сепак станува збор за престанок на судиска функција на судија од највисокиот суд во државата е осуден со правосилна пресуда.

– Истиот судија претходно ја негираше одговорноста, но се докажа дека не може никој, па ни судија да пркоси на фактите и доказите. Во овој момент, нема да се впуштам во коментирање на судската одлука и висината на казната и начинот на кој заврши овој случај, но секако мојот став околу овие прашања е да апелирам до граѓаните да не молчат и да не се плашат. Да се одважуваат и пријавуваат до Судскиот совет и до другите надлежни органи секакво коруптивно дејствие преземено од страна на судија. Секој случај кога судија лично или преку посредник ќе му побара поткуп или какво било дејствие или пак услуга заради влијание или донесување на судска одлука – изјави Дамева.

Таа додаде дека не смеат да дозволат „вакви поединци да ја уриваат сликата за целото судство“.

– Преземаме чекори во тој дел и понатаму граѓаните и јавноста ќе видат дека Судскиот совет работи и нема да дозволи вакви судии да останат. Поединците си имаат име и презиме, си имаме ние име и презиме. Само малку трпение од јавноста, затоа што веќе некои работи почнаа да се решаваат и резултатите ќе дојдат многу брзо – рече Дамева.

Иако за постапување по ова прашање имале рок од десет дена, Дамева рече дека постапување ефикасно и ажурно. До Судскиот совет била доставена пресудата од Основниот кривичен суд до Судскиот совет според која, врз основа на спогодба со која осомничениот Наќе Георгиев, судија на Врховниот суд е виновен за сторено кривично дело примање награда за противзаконито влијание и е осуден на казна затвор во траење од три години.

Инаку, согласно член 73 од Законот за судовите, на судијата кој е осуден со правосилна судска пресуда за кривично дело на безусловна казна затвор од најмалку шест месеци му престанува судиската функција.

Антоанета Димовска, како што пренесува МИА, изјавила дека како член на Судскиот совет законот не ѝ дозволува да навлегува во висината на казната, но и како член и како граѓанин, не е задоволна со ваквата пресуда, нагласувајќи дека за судиите нема олеснителна околност и дека „или си чесен или не си чесен“. Според неа, за судиите мора да се изрекуваат построги казни.

Основното јавно обвинителство за гонење на организиран криминал и корупција вчера склучи Предлог – спогодба со осомничениот судија во Врховен суд, Наќе Георгиев, за кој постоеше основано сомнение дека сторил кривично дело Примање награда за противзаконито влијание за кое е предвидена казна од 1 до 10 години затвор. Георгиев прифатил да му биде изречена казна затвор од три години, и забрана за вршење на професија.

Наќе Георгиев ќе лежи три години затвор и треба да врати 15.000 евра – Кривичен ја прифати спогодбата