Имињата на повеќе од 170 соработници на осудениот сексуален престапник Џефри Епстин би можеле да бидат објавени следниот месец по одлуката на американскиот судија. Се очекува меѓу нив да биде и името на британскиот принц Ендру, јавува Би-Би-Си, додавајќи дека тоа зависи од објавувањето на доказите обезбедени од жена која тврди дека принцот ја силувал во 2001 година.

Идентитетот ќе биде откриен како дел од тужбата против соработникот на Епстин, Гислајн Максвел. Секој од списокот има рок до 1 јануари да поднесе жалба и да побара неговото или нејзиното име да се отстрани.

Епстин, финансиер кој беше познат по тоа што се дружеше со членови на високото општество како принцот Ендрју, мистериозно почина во затвор во 2019 година. Неговата смрт, која дојде додека тој чекаше федерални обвиненија за трговија со луѓе, беше прогласена за самоубиство од њујоршкиот судски вештак.

Пресудата напишана во 51 станица, која завчера ја објави њујоршката судијка Лорета Преска, бара врските на Епстин да бидат „откриени во целост“. Тоа е последната пресуда во случајот што го покрена Вирџинија Џуфре против Гислајн Максвел, британска социјалистка која отслужува 20-годишна затворска казна за злосторствата што ги извршила со Епстин.

Тужбата за клевета на Вирџинија беше поднесена во 2015 година, а заврши со спогодба во 2017 година, при што имињата на соработниците на Епстин беа чувани во тајност, во согласност со одлуката на судот.

Во тужбата се цитираат 40 документи кои содржат сведоштво од Јохана Сјоберг, која тврди дека принцот Ендру ја пипкал по градите додека седел на каучот во станот на Епстин во Менхетен во 2001 година. Бакингемската палата претходно соопшти дека наводите се „категорично невистинити“.

Минатата година, принцот Ендру, кој ја носи титулата војвода од Јорк, ѝ плати на Вирџинија Џуфре милиони за да се согласи на спогодба во тужбата што таа ја поднесе во која се тврди дека тој сексуално ја нападнал кога имала 17 години.

Принцот Ендру рече дека никогаш не се сретнал со Џуфре и ги негираше нејзините наводи. Во новата пресуда, судијката Преска истакна дека многу од лицата наведени во тужбата веќе се јавно идентификувани во медиумите или на судењето на Гислајн Максвел.

Таа додаде дека многу други „не се противеле“ на објавувањето на документите. Некои од имињата на списокот ќе останат запечатени, вклучително и оние кои припаѓаат на децата-жртви, рече судијата во пресудата.

Републиканците во американскиот Конгрес бараат покана за објавување на записите од летот на приватниот авион на Епстин. Тој беше осуден во 2008 година за поттикнување малолетници на проституција. Епстин се движеше во кругови во кои беа вклучени клучни луѓе од светот на бизнисот и политиката.