Со дрската понуда да ја купи водечката компанија за развој на вештачката интелигенција, најбогатиот човек на светот, а сега и еден од најмоќните во американската администрација, тргна во отворена војна со не помалку влијателниот технолошки гигант Сем Алтман.

Конзорциумот инвеститори собрани околу Илон Маск понуди 97,4 милијарди долари за да ја купи во целост „Опен АИ“ на Алтман, компанијата што на пазарот го пласираше популарниот четбот Четџипити. Иако итно беше одбиена, понудата ја усложни реконструкцијата на „Опен АИ“ од непрофитен во профитен статус.

– Ако Сем Алтман и сегашниот одбор на директори на „Опен АИ“ имаат намера да станат целосно профитна корпорација, витално е да бидат компензирани за тоа што раководството им го одзема, контролата врз најтрансформативната технологија на нашето време – забележа адвокатот што ги застапува Маск и другите инвеститори.

Алтман итно и категорично ја отфрли понудата, и тоа со порака на социјалната платформа Икс, која е во сопственост на Маск.

– Не, ви благодарам, но ако сакате ние ќе го купиме Твитер за 9,74 милијарди – порача Алтман, користејќи го старото име на платформата.

На оваа објава Маск импулсивно коментираше: „Измамник“.

Десетгодишна војна

Ова е само нова пресметка во „војната“ што Маск и Алтман ја почнаа многу порано. Маск беше соосновач на „Опен АИ“ во 2015 година, но во 2019 година ја напушти и основаше нова компанија за вештачка интелигенција „Икс АИ“. Милијардерот, сепак, настојуваше да му го оспори авторитетот на Алтман и од страна коментираше каде и како треба да се насочи компанијата. Во тој период Маск ја тужеше „Опен АИ“ поради „измама од шекспирски димензии“, па ја повлече тужбата, па повторно ја тужеше, а на Алтман му се обраќаше со „Измамникот Сем“.

– Во „Икс АИ“ ние ги споделуваме вредностите за кои „Опен АИ“ ми вети дека ќе ги следи. Го направивме Грок со отворен извор и ги почитуваме правата на креаторите на содржини. Време е „Опен АИ“ повторно да биде сила со отворени извори, фокусирана на безбедноста, како што беше. Ние ќе се потрудиме тоа да се случи – порача Маск.

Неговиот конзорциум порача дека сумата понудена за преземање на „Опен АИ“ е почетна и дека би можела да се зголеми при евентуално наддавање.

„Опен АИ“ тврди дека реструктурирањето е нужно за да се обезбеди долговечност на компанијата и пристап до капитал. Ако не се насочи кон профит, компанијата смета дека нема да може да го одржува чекорот во глобалната трка за иновации на полето на вештачката интелигенција. Планот е реконструкцијата да заврши до крајот на идната година.

Во дуелот со Алтман, Маск сега е охрабрен од реалната моќ што му ја даде претседателот Доналд Трамп, поставувајќи го на челото на новата агенција задолжена да скастри стотици милијарди долари непотребни трошоци од федералниот буџет.

Сеење хаос кај противникот

И Алтман важи за поддржувач на Трамп, и присуствуваше на неговата инаугурација, но на свеченоста беше во задните редови, за разлика од Маск, кој беше десно од претседателот. Алтман пред две недели гостуваше во Белата куќа, која го промовира проектот „Старгејт“ за инвестиција на 500 милијарди долари во центар што би овозможил хардверска основа за развој на вештачка интелигенција. Маск не е вклучен во проектот „Старгејт“.

Анонимен извор близок до Маск изјави за „Фајненшл тајмс“ дека главната цел на Маск е да „посее хаос“ во конкурентската компанија, чија вредност е проценета на над 260 милијарди долари. Професорката Ен Липтон објаснува дека „Опен АИ“ воопшто не мора да се продаде, а како непрофитна организација е обврзана да ја следи својата мисија сѐ додека не заврши транзицијата.

Во конзорциумот околу „Икс АИ“ на Маск се инвестициска фирма на Џо Лонсдејл, соосновачот на фирмата „Палантир технолоџис“, која изработува софтвер за разузнавачки, одбранбени, антитерористички и други анализи за Пентагон и за Разузнавачката заедница на САД.

Алтман веќе предупреди дека Маск од новата позиција би можел да тргне во офанзива против конкурентите, пред сѐ со обликувањето на регулативите.

– Цврсто сум убеден дека Илон ќе го направи вистинското нешто и дека би било антиамерикански да се употреби политичката моќ, до степен што ја има Илон, за да им се наштети на конкурентите, а во полза на сопствениот бизнис – предупреди Алтман во декември.