Студенти од Факултетот за безбедност во Скопје денеска ја посетија Агенцијата за национална безбедност во рамките на Меморандумот за соработка меѓу АНБ и Факултетот за зајакнување на врските меѓу академската заедница и безбедносните институции. Првпат од основањето Агенцијата стана достапна за студентска публика. Директорот на Агенцијата Бојан Христовски вели дека е особено важно идните кадри да се запознаат со практичната работа и улогата на институцијата во системот на националната безбедност.

Во текот на посетата, студентите имаа можност да се запознаат со мисијата, надлежностите, организациската структура и оперативните приоритети на Агенцијата. Преку предавања и презентации од страна на искусни професионалци и експерти, студентите добија поширок увид во начинот на работа, тековните активности и предизвиците со кои се соочува АНБ во контекст на заштита на уставниот поредок, спречување на разузнавачки и субверзивни дејствија, како и соочување со современи безбедносни закани.

Особено внимание беше посветено на прашањата поврзани со борбата против тероризмот, сајбер-безбедноста, странското разузнавање и хибридните закани, кои претставуваат актуелни области од интерес и за академската заедница и за безбедносните институции. На тој начин, посетата придонесе за надградба на теоретските знаења на студентите со практични перспективи и реални искуства од терен. Оваа посета е дел од пошироките напори за унапредување на практичната едукација, размена на знаења и креирање на отворен дијалог помеѓу академските институции и стратешките државни субјекти. Агенцијата за национална безбедност и Факултетот за безбедност ќе продолжат со имплементација на заеднички активности, вклучително и обуки, работилници и научни трибини, со цел градење на професионални капацитети и поддршка на младите во нивната професионална определба, велат од Агенцијата за национална безбедност.