Шестемина млади мигранти-тинејџери, од кои петмина се малолетни, кои вчера беа спасени од услови на модерно ропство во скопското село Студеничани, биле жртви на татко и двајца синови, кои насила, под закана од оружје, ги држеле во подрум од куќа, давајќи им минимални количества храна и вода, соопшти денеска Јавното обвинителство. Мигрантите се спасиле испраќајќи порака по електронска пошта до Обвинителството, во која барале помош.

Таткото и синовите се осомничени за организирање на група и поттикнување на извршување на делата трговија со луѓе, трговија со малолетно лице и за криумчарење на мигранти.

„Вчера на електронската адреса на Службата за односи со јавноста пристигна порака со линк од локација и следната содржина: „Ние сме 6 странци и бевме киднапирани од вооружена група која бара пари за да нè ослободи. Ве молиме за итна помош. Се наоѓаме на оваа локација, во куќа во складиштето на куќата.SOS!“. Пораката, во координација со јавен обвинител од ОЈО Скопје, беше проследена до Секторот за компјутерски криминал во МВР. По брзата реакција и извршениот претрес во подрумските простории на станбен објект во с. Студеничани од страна на полициските службеници од МВР беа пронајдени шестмина илегални мигранти од кои петмина малолетници и едно деветнаесетгодишно лице“, велат од ОЈО.

„Двајца од осомничените, во текот на месец март годинава, заедно со организатор по потекло од арапските земји кој престојувал во Р.Грција и повремено во скопскиот регион, со цел стекнување имотна корист се здружиле и како дел од меѓународна криминална мрежа организирале меѓународна криминална група во РСМ која имала за цел вршење на кривично дело – Криумчарење на мигранти. Групата co помош на водичи т.н. „качаци“ организирала илегално пренесување на групи мигранти од територијата на Р.Грција на територијата на PC Македонија преку илегални премини т.н. зелена граница. По дадени задачи и насоки од првоосомничениот, неидентификувани припадници на групата со ПМВ ги прифаќале и ги преземале мигрантите и ги превезувале до с.Студеничани од каде тројцата осомничени ги прифаќале и времено ги засолнувале, а потоа илегално ги пренесувале од територијата на РСрбија кон државите на ЕУ“, соопштија од ОЈО.

“На 21 март годинава илегално се превезени шестемина мигранти кои првоосомничениот ги сместил и засолнил во подрумските простории на објект сопственост на неговиот татко во с. Студеничани. Со цел мигрантите да не го напуштат објектот, просториите во кои биле сместени биле постојано заклучени, а второ и третоосомничениот го обезбедувале објектот.

„На мигрантите им давале минимална количина на храна и вода, едно шише вода на ден за сите шестмина мигранти, а подрумските простории можеле да ги напуштат само заради извршување физиолошки потреби. Првоосомничениот во повеќе наврати секој ден им го загрозувал животот и здравјето заканувајќи им се дека нема да го напуштат подрумот сѐ додека од страна на нивните блиски не бидат исплатени парични средства во висина од 5.000 евра за да обезбеди нивно понатамошно илегално пренесување до Р.Србија. За таа цел најпрво им ги зел мобилните телефони на сите шестмина, по што во текот на четирите дена колку што престојувале, на двајца од нив им дозволувал еднаш дневно да остварат видеоповик со криумчарот-организатор од арапските земји со цел истиот да ги извести нивните семејства да ги исплатат бараните парични средства“, велат од ОЈО. Ценејќи дека се исполнети условите за определување на мерката притвор, предметниот обвинител ќе му предложи на судијата на претходна постапка при Основниот кривичен суд да ја определи за сите осомничени“, додаваат од ОЈО.

Драма во Студеничани: Криминалци насила држеле мигранти во подрум, ги ослободила полицијата