Одбојкарите на Струмица 47&72 се ново-стар шампион во машка младинска конкуренција. Повеќекратниот првак ја продолжи доминацијата во конкуренција до 21 година, откако во финалето на Ф4 турнирот во Скопје со 3:0 (25:16, 25:17, 25:15) го совлада Борец.

Велешкиот состав се обиде да понуди (по)силен отпор, но не можеше комплетно да се носи со тимот на Јован Ристоманов, кој имаше контрола на играта во текот на сите три сета.

Во дуелот за бронзениот медал Весна Пробиштип во три сета беше подобра од Работнички 71&22.

Во женска конкуренција младинките на Јанта Волеј Кисела Вода се новите шампионки откако на финалниот турнир во салата „Јане Сандански“ во Скопје, во финалето со пресврт и во пет сета 3:2 (22:25, 22:25, 25:20, 26:24, 15:8) го совладаа бранителот на титулата Наковски Волеј.

Како вистинска увертира за финалето беше и дуелот за бронзениот медал, кој исто така беше решен по голема борба во пет сета, каде Работнички Скопје со 3:2 (20:25, 25:15, 25:15, 18:25, 15:9) ги победи Газели Волеј.