Maкедонскиот шампион Струга Трим Лум денеска го очекува реванш-натпреварот во квалификациите за Лигата на шампионите против Слован Братислава.

Струга во првиот натпревар успеа да стигне од 2:0 до 2:2, но потоа во финишот прими нови два гола, па Слован победи со 4:2. Два гола надополнување против силниот тим на Слован, кој во своите редови има неколку репрезентативци на Словачка, која играше на Европското првенство, е тешка задача.

Во редовите на Струга знаат што ги чека, но не се откажуваат. Пред натпреварот зборуваше стрелецот на двата гола за стружани од првиот натпревар, Бесарт Ибраими.

„Го анализиравме последниот натпревар и се надевам дека нема да ги повторуваме истите грешки. Исто така се надеваме дека среќата сега ќе биде на наша стана. Наша задача како напаѓачи е да постигнуваме голови, но најважна е целта на тимот“, изјави Ибраими.

Натпреварот помеѓу Струга и Слован се игра од 17:00 часот на Градскиот стадион во Охрид.