„Зборуе Радио Скопје, зборуе Радио Скопје“ се зборовите со кои Владо Малески, писател и борец во НОВ, го означи почетокот на работата на Македонското радио. Овие зборови прозвучија во етерот на 28 декември 1944 година, за време на одржувањето на Второто заседание на АСНОМ.

Во „Ла Кања“, во Старата скопска чаршија, на 27 декември, од 21 часот, во предвечерјето на овој исклучително значаен јубилеј за македонската државност и култура, „Канал 103“ во соработка со „Партизанска штампа“, „5060“ и „Фликер студио“, ќе го претстави пригодниот свечен постер во авторство на македонскиот ликовен уметник Иван Ивановски, едноставно насловен „Зборуе Радио Скопје“. Се работи за графика во сито печат техника, достапна во ексклузивен лимитиран тираж.

Вечерта звучно ќе ја обликува Ѓорѓи Јаневски со широк спектар на македонска музика во сите правци, архивски материјали, теренски снимки и некои необјавени ушни задоволства.