На крајот на јули оваа година, речиси 197 илјади граѓани во Хрватска имаа блокирани сметки, а вкупниот долг зад овие блокирања достигна речиси 3 милијарди евра.
Покрај тоа, евидентирани се повеќе од 13 илјади деловни субјекти со блокирани сметки, чиј вкупен долг се искачува на повеќе од 700 милиони евра, објави Финансиската агенција (ФИНА).

Во споредба со претходниот месец, бројот на граѓани со блокади е зголемен за еден процент, додека во споредба со минатата година е забележано мало намалување од 2,3 проценти. Вкупната главница на нивните долгови на крајот на јули изнесуваше приближно 2,91 милијарди евра, што претставува мало зголемување во споредба со јуни и значително зголемување во споредба со истиот месец минатата година.

Кога на главницата ќе се додаде долгот настанат врз основа на камата, вкупната вредност на долгот на граѓаните со блокирани сметки надминува 4 милијарди евра. Од тоа, долгот кон банките е околу 650 милиони евра, додека сите финансиски институции заедно побаруваат околу 730 милиони евра, пишува Дневно- пренесува Бизпортал.рс.

Што се однесува до деловните субјекти, нивните долгови ја надминаа јунската вредност за речиси 10 милиони евра, а вкупниот долг на крајот на јули достигна речиси 956 милиони евра, вклучувајќи ја главницата и каматата. Бројот на деловни субјекти со неплатени фактури се зголеми за 5,4 проценти во споредба со јуни, додека во споредба со минатата година сепак беше помал за околу 3,6 проценти.

Меѓу блокираните субјекти, 44,4 проценти се правни лица, чиј долг изнесува повеќе од 80 проценти од вкупните неплатени обврски. Останатите се претприемачи, односно физички лица кои вршат регистрирана дејност, а нивното учество во вкупниот долг е значително помало.

Во споредба со јуни годинава, бројот на блокирани правни лица е зголемен за 12,6 проценти, додека нивниот долг е зголемен за 1,6 проценти. Бројот на физички лица со блокирани обврски остана речиси непроменет, со минимално зголемување на долгот.