Протестите и блокадите на незадоволните граѓани од загадувањето како последица на пожарите на депониите и од пожарот кој го зафати објектот за рециклирање на електронски отпад во Трубарево, утре ќе се одржат двапати во текот на денот.

Движењето „Стоп за Вардариште“ информира дека на 15.09.2025, покрај протестот во 18 часот, ќе се одржи и протест со почеток од 7.30 часот наутро, со блокада на мостот „Близнак“ помеѓу општините Аеродром и Гази Баба.

Овој чекор го преземаме поради немањето слух на надлежните органи за нашите барања и се поголемото труење кое му се прави на овој народ. Ги повикуваме работодавците да бидат толерантни за работниците кои ќе задоцнат тој ден на работа – велат од „Стоп за Вардариште“.

Тие вчера попладне повторно ја блокираа крстосницата помеѓу булеварите Србија и АСНОМ и го искажаа својот револт од загадувањата од депониите и побараа итно решение од надлежните, а на протестот можеа да се видат и паролите. „Премиерот дише ист воздух или има друг“, „Меѓу две депонии умира еден град“, „Не сакам да гледам што дишам“.