Генералниот секретар на НАТО, Јенс Столтенберг денеска го поздрави одобрувањето од страна на Комитетот за надворешни работи на турскиот парламент за пристапување на Шведска во Северноатлантската алијанса, чекор што го отвора патот за формално прифаќање на земјата во пактот.

Турција беше последната земја-членка на НАТО, заедно со Унгарија, која го блокираше патот на Шведска кон членство во пактот.

-Верувам дека (овие две земји) ќе ги завршат процедурите за ратификација на пристапот на Шведска што е можно побрзо, што ќе го направи НАТО посилен, рече Столтенберг во изјавата.

Претходно, комисијата за надворешна политика на турскиот парламент ја одобри кандидатурата на Шведска за членство во НАТО, што е клучен чекор кон проширување на Алијансата.

Кандидатурата беше одобрена по 19 месеци одложувања во кои Анкара бараше отстапки од Стокхолм.

Следниот чекор ќе биде гласање за кандидатурата на Шведска во парламентот за неколку недели, кога се очекува турските пратеници да го поддржат предлогот, пишува Ројтерс.

Пa се очекува турскиот претседател Реџеп Таип Ердоган да го потпише законот за да стане закон.

Шведска и Финска аплицираа за членство во НАТО минатата година, а Анкара само го ратификуваше барањето на Финска.

Ердоган во декември предложи парламентот да го одобри барањето на Шведска само ако американскиот Конгрес и дозволи на Турција да купи десетици борбени авиони Ф-16 и резервни делови и ако другите сојузници на НАТО, вклучително и Канада, го укинат ембаргото за оружје за Анкара.