Издавачката куќа „ПНВ Публикации“ на 29 мај во кафе-книжарницата „Буква“ ја промовираше стихозбирката „Второ детство“ од Емануела Ковачевска Китановска.

Промотор на книгата беше теологот Коста Милков, а настанот го модерираше Јулијана Величковска. Изданието е поддржано од Министерството за култура и туризам.

– Поетската збирка „Второ детство“ на Емануела Ковачевска Китановска е поетска целина на опус создаван во континуитет. Не толку временски колку во етосот, во емоциите, во илустрациите и во севкупниот сензибилитет на поетското изразување. Но, ова не значи дека од Прологот и првата песна по ред „Сонот на фетусот“, па сѐ до последното пеење во Епилог, Емануела се стремела кон поетска целина што е затворена. Напротив, нејзиното „пеење“ е отворено кон сѐ понови и понови видици, кон сѐ понова и понова општа „географија“ на физичкиот и на метафизичкиот свет, но исто така и специфична географија на телото, на умот, на духот, на душата и, над сѐ, на срцето – посочи Милков.

Емануела Ковачевска Китановска е поетеса и студентка на Факултетот за психологија при МИТ Универзитет во Скопје. Авторка е на стихозбирките „Кожена душа“ (без ISBN), за која ја освои наградата „Антев часовник“ во 2019 година на манифестацијата „Антево перо“, и „Второ детство“ (2025, „ПНВ Публикации“). Добитничка е и на наградата „Најмлада поетска искра“ на Меѓународниот фестивал „Литературни искри“ во 2019 година во Гостивар.

(Текстот е објавен во „Културен печат“ број 283, во печатеното издание на весникот „Слободен печат“ на 31.05.-01.06.2025)