Цените на становите во Скопје во првиот квартал годинава се зголемиле за 19,4 проценти во споредба со истиот квартал лани, а за 7,2 проценти во споредба со претходните три месеци, покажува Индексот на цени на станови на Народната банка.

Ова е најголемиот годишен скок на цената на станбениот квадрат во главниот град во последните 17 години.

Во првиот квартал од минатата година цените на становите забележаа поскапување од 4,7 проценти на годишно и пад од 0,8 проценти на квартално ниво, што беше прво минимално квартално намалување по речиси пет години.

Во вториот квартал од 2024-тата, становите забалежаа поскапување за 11,5 проценти на годишно ниво и од 8,2 проценти на квартално ниво. Во третиот квартал лани растот на годишно ниво изнесуваше осум проценти, а на квартално имаше пад од 0,3 проценти, по што повторно следуваше раст во четвртиот квартал – на квартално ниво за 3,3 проценти, а за 10,6 проценти на годишно ниво.

Индексот на цени на станови го подготвува Народната банка, врз основа на податоци кои се однесуваат на огласени станови за продажба на територија на градот Скопје.