Млад новинар од Чачак, Србија, Милош Лукиќ (35), кој некое време се борел со коронавирусот, утрово ја загубил битката во клиничко-болничкиот центар „Др. Драгиша Мишовиќ“ во Белград, пренесува Блиц.рс. 

Првично веста за смртта на Милош ја објави порталот „Круг“, чиј долгогодишен соработник бил токму прерано починатиот Лукиќ.

„Нашиот драг колега, пријател и соработник Милош Лукиќ од Чачак почина денеска во Клиничко-болничкиот центар „Др. Драгиша Мишовиќ“ во Белград како последица од Ковид-19, тој имаше само 35 години“, стои на почетокот од соопштението на порталот, каде неговите колеги со емотивни и детално одбрани зборови се збогуваа од младиот Лукиќ.

Милош бил долгогодишен соработник и работник за речиси сите медиуми во Чачак, а подоцна бил и дел од националната агенција „ФоНет“.

Од октомври 2018 година бил основач и сопственик на новинската агенција „МНА“, со која самостојно известувал, воедно помагајќи им на колегите кога тоа било најпотребно и најтешко, посетувајќи места и настани кои малкумина прифаќале да ги посетат, вклучувајќи и жаришта на актуелната пандемија.