Среде антикризните мерки ќе се менуваат ознаките на полициските униформи
Иако подолго време беше најавувана двојазичност на ознаките на униформите на полициските припадници, токму денеска и дојде редот на вечерашната 28-ма владина седница. Имено вечерва Владата ја донесе Уредбата за униформата и ознаките на униформата на полицијата.
Препорачано
-Оваа Уредба е донесена врз основа на Законот за употреба на јазиците, каде што според член 8 став (3) е утврдено дека униформите на полицијата во Скопје и во општините во кои најмалку 20% од граѓаните зборуваат службен јазик различен од македонскиот јазик, се напишани на македонски јазик и неговото кирилско писмо, како и на јазикот што го зборуваат најмалку 20% од граѓаните во Република Северна Македонија и неговото писмо, соопштија од Влада.
Интересно е што на истата вечерашна седница Владата донесе низа антикризни мерки за рационализација на трошоци во јавниот сектор со кои на сите буџетски корисници и единки корисници се задолжени да ги намалат расходите за стоки и услуги за 10% и да достават соодветен предлог за рационализација на трошоците до Министерството за финансии најдоцна до 21 март.
Мерките се однесуваат на забрана за набавка на мебел и возила, намалување за 50 отсто на расходите за репрезентација, спонзорства и реклами како и користење на службените возила.
Рационализацијата на трошоците ќе биде и во делот на бројот на службените патувања и бројот на членовите на делегациите при патувања во странство.
Кратењето на трошоците ќе важат и за јавните претпријатија и АД во државна сопственост како и за регулаторните тела, на единиците на локалната самоуправа, локалните јавни претпријатија и останатите установи кои се под надлежност на општините.
– Буџетските корисници и единките корисници со овие мерки се задолжени до крајот на 2022 година, а на општините, јавните претпријатија, регулаторните тела, АД во државна сопственост и останатите субјекти во јавен сектор им се препорачува да ги почитуваат донесените антикризни мерки и да се воздржат од помалку суштинските расходи, соопшти Владата.
Од друга страна Уредбата за промената на ознаките на униформите во полиција влегува во сила осмиот ден од денот на објавувањето во „Службен весник на Република Северна Македонија”, а ќе отпочне да се применува во текот на една година од денот на влегувањето во сила.
Вицепремиерот Артан Груби на Фејсбук веќе се пофали дека со „уште една успешно извршена задача!“
– Албанскиот јазик официјално и во полициските униформи! На денешната седница на Владата ја усвоивме измената на Уредбата за униформите и нивните симболи со која се предвидува употреба на албанскиот јазик како службен јазик во униформите на полициските служби согласно законот, напиша Груби на Фејсбук презентирајќи го новиот двојазичен амблем на полициските униформи.
