Со поемата „Никогаш пред ил’ потем“, пратена под шифра „Хидаспес“, поетот Андреј Ал-Асади стана добитник на наградата „Григор Прличев“ за најдобра поема за 2024 година.

Жирито кое одлучуваше за наградата беше составено од книжевните дејци Славе Ѓорѓо Димоски, Димитар Пандев и Бранко Цветкоски. Поемата, како подолга литературна творба во стихови, најчесто со лирско-епски карактер, е предизвик за сите поети.

– Предизвикот да се напише една поема не е воопшто едноставен и лесен. Главната причина за тоа е што поемата претставува еден вид на еквилибрист помеѓу поезијата и прозата, каде што авторот треба да го задржи раскажувачкиот дух од почеток до крај, додека уредно води сметка за структурата, ритамот и римата. Сепак, иако не е воопшто лесно и безопасно (посебно кога си вдахнат од мајстори како Фузули или Џами), крајниот резултат е повеќе од задоволителен – изјави Ал-Асади за „Културен печат“.

Поетот Андреј Ал-Асади (1996, Лондон) дипломирал на Економскиот факултет при Универзитетот „Св. Кирил и Методиј“ во Скопје. Автор е на стихозбирките „Midnight Blues“ (2013, „Антолог“), како и „Под дервишовото сиќе“ (2018, „ПНВ Публикации“), „Небесна геометрија“ (2019, „ПНВ Публикации“) и „Секој секому огледало“ (2021, „ПНВ Публикации“) со кои трипати влезе во најтесниот избор за наградата „Браќа Миладиновци“ што ја доделуваат Струшките вечери на поезијата, а добитник е на наградата „Енхалон“, што исто така ја доделуваат Струшките вечери на поезијата.

Автор е и на збирките раскази „Друго минато“, за која во 2018 година ја доби наградата за дебитантски прозен ракопис „Новите!“ од „Темплум“ и „Утрото на бессоните“ (2021, „Бегемот“).

Досега учествувал на повеќе поетски читања и фестивали, меѓу кои: „Поетска ноќ во Велестово“, „Струшки вечери на поезијата“, Светскиот поетски фестивал во Патрас, Грција, како и на интернационалниот поетски фестивал „Стих у регији“ во Загреб, Хрватска.

Негови песни се преведени на англиски, арапски, српски, хрватски, босански, грчки и на италијански јазик. Член е на Управниот одбор на Скопскиот поетски фестивал. Со поемата „Никогаш пред ил’ потем“ и наградата „Григор Прличев“ Ал-Асади отвора нови страници во своето творештво.

– Тематската одредница на мојата поема е средбата помеѓу Александар (како симбол на апсолутната земска власт) и Дандамис (како симбол на апсолутната духовна власт). Поемата го обработува личното и психолошко патешествие на една од најпознатите личности во историјата, илустрирајќи ја двостраната спрега помеѓу моќта и понизноста, богатството и сиромаштвото, гневот и љубовта – открива Ал-Асади.

Наградата „Григор Прличев“ за најдобра поема ќе се додели на поетската манифестација „Прличеви беседи“ на 5 февруари 2025 година во Охрид.

(Текстот е објавен во „Културен печат“ број 263, во печатеното издание на весникот „Слободен печат“ на 11-12.01.2025)