Претседателот на меѓународното жири на „Остен Биенале Скопје 2024“ и амбасадор на „Остен“, Бруно Кора (Италија) е исклучително истакната личност во светот на уметноста, познат по својот придонес како критичар, автор, едукатор и куратор на многубројни уметнички изложби уште од 60-тите години на минатиот век.

Роден е во Рим, но по студиите се преселил во Милано, бидејќи почувствувал дека таму може да го пронајде своето место во уметноста. На почетокот живеел заедно со група уметници и секојдневно разговарале за уметноста, а на тој начин сфатил што значи да се биде уметник.

– Ако не живееш со уметниците, ако не го делиш секојдневието со нив, тогаш е многу тешко да влезеш во светот на уметноста, да го разбереш нивниот менталитет, јазик на комуникација и начин на размислување. Таквите искуства е невозможно да се прочитаат во книга. Мора лично да ги доживеете и на тој начин го формирав мојот професионален профил – открива Кора.

По враќањето во Рим, се сретнал со неколку уметници со кои основале асоцијација и секојдневно организирале изложби, перформанси и дискусии за уметноста. Меѓу најзначајните интернационални изложби која ја организирал била со наслов „Контемпорарија“ и се одржала во Рим во 1973 година. Во изложбата биле ангажирани десет куратори, на десет јазици со десет уметнички дисциплини. Изложбата била поставена во подземен паркинг во Рим, траела три месеци и ја виделе околу 90 илјади луѓе.

На тој начин стапил во контакт со многу значајни уметници од целиот свет, како Јозеф Бојс, Герхард Рихтер, Сигмар Полке, Сол Ле Вит, Ричард Сера и многу други.

Во Италија бил дел од движењето „Арте повера“, во кое се приклучиле уметници од неговата генерација, како Микеланџело Пистолето, Јанис Кунелис, Марио Мерз, Лучијано Фабро и други, со кои живеел и работеле заедно. По своето значење, „Арте повера“ е веднаш по футуризмот во италијанската современа уметност.

Триесет години Кора предавал уметност на различни универзитети и бил директор на пет музеи. Првите искуства како член на жири ги стекнал пред многу години на Биеналето во Љубљана.

Со Корнелија Конеска од „Остен“ се запознале преку Ларс Керулф Мулер од Данска, кој претходно бил претседател на меѓународното жири на „Остен“.

(Текстот е објавен во „Културен печат“ број 267, во печатеното издание на весникот „Слободен печат“ на 8-9.2.2025)