Еден од најпрепознатливите знаци на Белград, споменикот на српскиот кнез Михаило на централниит Плоштад на Републиката, пред Нова година се најде „зад решетки“, односно како составен дел од бината за новогодишниот дочек, реагираше вчера опозициската Партија на слободата и правдата.

Од партијата велат дека бината ја поставила компанија од групата „Скај мјузик“, на која Привремената управа на градот Белград ѝ доделила вртоглави 900.000 евра за рекламирање, пренесува телевизијата „Н1“.

Се работи за фирма од групата „Скај мјузик“, која добивала пари за рекламирање на градската управа, но и чии манифестации биле прогласени за „настани од посебно значење“ од страна на градоначалникот на Белград, Александар Шапиќ.

„Шапиќ настаните на „Скај мјузик“ во 2022 година ги прогласи за настани од посебно значење за Белград, па така белграѓани станаа финансиери на настаните на оваа компанија, а за некои од нив дополнително и плаќаат билети“, велат од ССП во видео објавено на социјалните мрежи.

Бината на Плоштадот на Републиката предизвика бурни реакции, но и загриженост кај експертите бидејќи беше поставена така што целосно го опфатила споменикот, а металните елементи се потпираат директно на неговиот постамент.

Во писмо до Секретаријатот за одбранбени прашања, вонредни состојби и координација, Институтот за заштита на спомениците на културата од Белград предупреди дека бината поставена за организираната новогодишна ноќ на плоштадот на Републиката го загрозува споменикот на кнезот Михаило и дека треба итно да се отстранат елементите од скелето на сцената кои директно се потпираат на мермерниот постамент, бидејќи може да биде загрозена неговата стабилност.