Околу 15 специјалисти од Србија и Чешка пристигнаа во Македонија да помогнат во лекувањето на повредените од вчерашниот пожар што се случи во дискотеката во Кочани. Како што денеска соопшти министерот за здравство, Арбен Таравари, се очекува да пристигнат и специјалисти од Израел и сите ќе бидат распоредени онаму каде што има потреба.

Таравари појасни дека дел од пациентите се транспортирани надвор од државата не затоа што немаме центар за изгореници, туку затоа што се работи за голем број на пациенти.

– И да одите во поголеми држави нема центри за изгореници. Гледате дека сите држави прифаќаат од двајца до петторица пациенти, не повеќе. Кај нас се случи шок, изгореници на повеќе од 100 лица што треба да се третираат и нормално е дека немаме капацитети добро да ги третираме. Овие пациенти поради комликациите што се јавуваат од изгорениците, а сите се од втор или трет степен, веќе постои опасност од инфекции и целта ни беше да се третираат што подобро, а ние да сме подготвени евентуално за пациенти кои биле латентни – изјави Таравари.

Директорот на Фондот за здравствено осигурување (ФЗО) Сашо Клековски оцени дека македонскиот здравствен систем одлично се снашол во целата ситуација и дека и да сме имале центар за изгореници не би можело да им се пружи соодветена грижа затоа што пациенти со вакви изгореници бараат посебен треман.

– Со целата критика на македонското здравство вчера над 140 повредени беа прифатени во многу краток период. Зборуваме за пациенти кои имаат изгореници од втор и трет степен на повеќе од 10, 20, 30 проценти од површината. Морам да кажам дека првата фаза на згрижување на пациентите е завршена, никој не остана незгрижен. И да имавме центар за изгореници ќе имавме бокса за четири-пет пациенти – истакна Клековски.