Имаме стратегија за сајбербезбедност, но во заканите и заштитита од сајбернападите треба да се вклучиме сите заедно, оти тие генерално се многу поопасни и со поголема разорна моќ од конвенционалите напади, одговори министерот за внатрешни работи Оливер Спасовски на прашањето колку државата е подготвена на ова поле, по зачестените дојави за бомби.

„Прво има стратегија за сајбербезбедност, која предвидува на колку нивоа и каде се реализираат сите активности, кои ќе значат подобра Сајбер безбедност. Агенцијата за електронски комуникации има посебен тим, посебен дел кој се занимава со сајбербезбедност. Но, едно треба да знаеме сите, безбедноста не е ниту еден човек, ниту една институција, безбедноста сме сите ние и колку повеќе ќе се подготвиме сите заедно, зборувам за институциите на системот и од аспект на материјалните и технички средства и од аспект на човечки ресурси, толку поотпорни ќе бидеме на овие сајбернапади и закани кои ги добиваме. Така да генерално не само кај нас, последните години се посветува многу повеќе внимание на сајберкриминалот и безбедноста, заради тоа што се увиде дека вакви напади можат да бидат поопасни и со поголем разорна моќ, отколку конвенционалните, така што во овој дел треба сите заедно и посветено да се бориме кон создавање на еден систем кој што би бил имун во делот на сајберзаканите, рече Спасовски.