Назначувањето на посебниот советник на министерот за правда Андреја Весов кој беше кандидат за пратеник од ЗНАМ, за член на Програмскиот совет на Академијата за судии и јавни обвинители се најде во реакција на Блупринт-групата за реформи во правосудството, а министерот за правда Игор Филков рече дека иако тој смета дека Весов ги исполнува условите, ќе го разгледаат предлогот.

Според мрежата на граѓански организации Весов не ги исполнува критериумите од Законот за Академијата за судии и јавни обвинители за да биде назначен на оваа позиција.

-Имено, според член 19 од Законот за Академијата за судии и јавни обвинители, како член на Програмскиот совет може да биде избран ‘раководен државен службеник од Министерството за правда со најмалку осум години работен стаж на работи од областа на правосудството, по положен правосуден испит.’ Оттаму, според јавно достапните информации, членот на Програмскиот совет кој е назначен е вработен како посебен советник на министерот за правда, позиција што не се квалификува како раководен државен службеник согласно Законот за административни службеници, туку како ангажман на определено време според Законот за вработените во јавниот сектор – се вели во реакцијата на Блупринт-групата за реформи во правосудството.

Како дополнителен момент што според Блупринт-групата сериозно ја нарушува перцепцијата за независност и непристрасност на Академијата, особено во процесот на избор и обука на идни судии и јавни обвинители, е поврзаноста на Весов со одредена политичка партија и неговата кандидатура за пратеник на последните парламентарни избори.

– Академијата треба да биде деполитизирана, професионална институција чија главна мисија е зајакнување на правосудниот кадар и унапредување на владеењето на правото. Програмскиот совет мора да биде составен од професионалци со несомнено искуство и интегритет како би се обезбедило објективен процес на селекција и прием на слушатели на Академијата, ова особено што во изминатите години речиси во секоја генерација на прием на слушатели на Академијата за жал се соочуваме со различни сомнежи или нерегуларности кои го поткопуваат интегритетот на оваа клучна институција – велат од Блупринт-групата за реформи во правосудството.

Во однос на реакцијата, Филков рече „во моментов предлогот ќе го видиме, но јас сметам дека има подобрување во предлозите“.

– Како и досега сите забелешки од Блупринт групата ни се особено важни, затоа тие во моментов се вклучени и придонесуваат во осум од десет работни групи. Во однос на нивната забелешка, колегата Весов е на позиција и доаѓа како посебен советник со повеќе од десет годишно искуство како адвокат, со положен правосуден испит, за разлика од претходната личност што беше делегирана од истата позиција од Министерство за правда – рече Филков.