Советот на Европа бара од 46-те земји членки да покажат политичка волја и да ги спроведат пресудите на Европскиот суд за човекови права (ЕСЧП) во Стразбур и да ги подобрат своите капацитети за тоа.

-Почитувањето на судските одлуки е од суштинско значење за владеењето на правото. Низ цела Европа Конвенцијата за човекови права ги смени на подобро животите на луѓето, но за да продолжи позитивниот импакт земјите членки на Советот на Европа мора да покажат политичка волја и целосно и доследно да ги спроведат пресудите – вели генералната секретарка на Советот на Европа (СЕ), Марија Пејчиновиќ Буриќ.

Изјавата на Пејчиновиќ Буриќ е дадена по објавувањето на годишниот извештај на Комитетот на министри на Советот на Европа за спроведување на пресудите на ЕСЧП. Извештајот кој што ги опфаќа сите членки на СЕ плус Русија покажува дека после Турција и Русија во Бугарија има најмногу „случаи на чекање“. Меѓу нив е и случајот со пресудите за ОМО Илинден-Пирин.

„Комитетот на министри забележува дека повеќе од 16 години по првата конечна пресуда во случајот ОМО Илинден-Пирин и други групи против Бугарија за здруженија чија цел е да „постигнат признавање на македонското малцинство“ и натаму рутински се одбива регистрацијата. До денес, и покрај некои чекори преземени од властите, Агенцијата за регситрација и судовите сѐ уште не дејствуваат во согласност со Конвенцијата. Комитетот бара од властите да ги преземат неопходните мерки за да обезбедат барањата за регситрација да се разгледуваат во согласност со Член 11 од Конвенцијата и да ја прошират обврската на Агенцијата да дава инструкции за исправка на досиејата за регистрација“, пишува во извештајот за случајот со ОМО Илинден.

Од Советот на Европа велат дека по изборите во Бугарија чекаат да се формира нова влада и дека повторно ќе го постават прашањето за овој случај.

На брифинг за медиумите во врска со извештајот, шефицата на Одделението на СЕ за спроведување на пресудите на ЕСЧП, Клер Овеј, на прашање од „Слободен печат“ рече дека се работи за тешко политичко прашање, а премногу долго време се чека на спроведување на пресудата.

– Пресудата за ОМО Илинден-Пирин не значи признавање на малцинство, туку регистрација на здружение. Според статутот и целите на организацијата, нејзината регистрација не е ризик за Бугарија. Пресудата е премногу долго време „на чекање“, а во меѓувреме Комитетот на министри донесе неколку резолуции. Таму имаше избори и кога ќе се формира нова влада повторно ќе разговараме за ова – ни одговори Овеј.

Во извештајот на Советот на министри во делот за Бугарија се наведува дека лани од ЕСЧП за супервизија добиле 37 случаи против Бугарија, а на 31 декември Бугарија имала 182 случаи „на чекање“ за извршување на пресудите, меѓу кои и група пресуди за слобода на здружување.

За споредба, за Македонија ЕСЧП лани до Комитетот на министри за супервизија на извршувањето испратил 10 случаи, а на карајот на годината земјава имала вкупно 29 случаи „на чекање“ кои вклучуваат една група за прекумерно полициско дејствување, еден случај за родово признавање, како и еден случај за слобода на изразување.

Последниот годишен извештај на Комитетот на министри покажува дека лани од ЕСЧП дибиле 1.459 кои чекаат извршување на пресудите, а 880 случаи биле затворени. Податоците покажуваат дека до крајот на годината во ЕСЧП имало 6.112 случаи за кои пресудите требало целосно да бидат спроведени. Најмногу од нив, 2.352 или 38 отсто се за Руската федерација која што беше исклучена од Советот на Европа на 16 март 2022 поради агресијата врз Украина. Иако шест месеци го прекина учеството во ЕСЧП, Русија, според меѓуанродното право е обврзана да ги спроведе пресудите од Европскиот суд.