Граничните полиции на Црна Гора и Босна спречија шверц на девет малолетници од Египет и поднесена е кривична пријава против државјанин на Босна и Херцеговина под сомнение за шверц на луѓе, пишува РСЕ.

На 23 септември, црногорската полиција објави дека операцијата е заснована на информации добиени од гранични полицајци во Плевља, град на северот од земјата во близина на границите со Босна и Херцеговина и Србија.

„Преку оперативна работа на терен, тие се запознаа со рутата на движење на мигрантите, местото на нелегално преминување на државната граница, како и со информации што укажуваат на постоење на организиран шверц на луѓе кон БиХ“, се вели во соопштението на црногорската полиција.

Врз основа на овие информации, службите на двете земји организираа заседа.

Група мигранти ја преминале рутата од Плевља до црногорско-босанската граница, а потоа, заобиколувајќи го официјалниот граничен премин, нелегално преминале во Босна и Херцеговина во градот Колибе и го продолжиле своето движење.

Потоа, службениците на граничната полиција на Босна и Херцеговина го запреле и провериле автомобилот „Фолксваген Пасат“, управуван од С.К. од Тузла.

По прегледот на возилото, во него биле пронајдени девет странски државјани – малолетни мигранти од Египет, кои пристигнале на територијата на Плевља од правец на Подгорица.

Службениците на граничната полиција на БиХ, по наредба на државниот обвинител, против едно лице поднеле кривична пријава поради сомнение за сторено кривично дело шверц на луѓе.

Управата на црногорската полиција објави дека продолжува да разменува разузнавачки информации и да соработува со соседните земји со цел да ги разбие мрежите за шверц.