Две лица се повредени во сообраќајна несреќа што се случи денеска околу 17:30 часот на крстосницата во близина на Собранието на Република Северна Македонија, потврдија од Министерството за внатрешни работи за МИА.

Во несреќата учествувале две патнички возила – „Ауди“ и „Алфа“. Повредените лица се пренесени со возила на Итна медицинска помош во Градската општа болница „Св. Наум Охридски“ и во Ургентниот центар при Клиничкиот центар „Мајка Тереза“.

Како што соопштија од МВР, полициски екипи извршуваат увид на местото на настанот за да се утврдат причините за несреќата.

Доктор Драган Панов, шеф на смена во Брза помош – Скопје, за МИА потврди дека двете лица се здобиле со потешки телесни повреди.