Во последните денови на 2021 година во просториите на Народната и универзитетска библиотека „Св. Климент Охридски“ – Скопје беше потпишан Меморандум за соработка помеѓу Сојузот на композиторите на Македонија – СОКОМ, застапуван од Претседателката на СОКОМ, проф. д-р Валентина Велковска – Трајановска и НУБ „Св. Климент Охридски“.

Меморандумот за соработка произлезе од заедничката иницијатива на директорката на НУБ, Јелисавета Костадинова, и м-р Елени Новаковска, раководител на музичката збирка при НУБ. Активностите во рамките на соработката на двете институции ќе се одвиваат во насока на заштита и промоција на македонското музичко творештво што како наследство го оставија генерациите македонски композитори и творци.

– Со потпишувањето на Меморандумот ги официјализиравме долгогодишните заложби на повеќе композитори и музикологот Елени Новаковска за интензивирање на соработката на СОКОМ со НУБ „Св. Климент Охридски“ – Скопје. Од исклучително значење е музичкото културно наследство што во минатото го создадоа македонските композитори, што треба да се проследи, обработи, архивира, заштити и зачува преку грижата за нивните легати.

Со нашата соработка ќе може да се утврдат, изработат и подобрат состојбите со сите материјали на починатите композитори, а финално доколку успееме да ги реализираме сите фази на предвидените активности освен зачувувањето и заштитата ќе се овозможи и реална достапност до нотниот материјал, партитури за понатамошни изведби, нивно истражување и анализа – истакна Претседателката на СОКОМ, Валентина Велковска – Трајановска.