Сојузот на композиторите на Македонија (СОКОМ), како дел од својата продукциска активност, го издаде компакт-дискот „Ана Пандевска – од композиторскиот опус“. Станува збор за прв авторски компакт-диск на композиторката Ана Пандевска.

– Посебно ми е важно што е издаден мојот прв авторски компакт-диск, со оглед на тоа што музиката што е дел од ова издание е само еден мал сегмент од сето она што го имам напишано во последниве години. На ЦД-то се наоѓаат осум композиции кои се напишани од 2015 до 2021 година. Направена е селекција на дела за соло-пијано, четирирачно пијано, како и камерни и оркестарски дела. Музиката е електроакустична и е изведена во повеќе наврати на различни концерти и фестивали во текот на годините. Дел од композициите се наградени со први и втори места на конкурси по композиција – објасни Ана Пандевска.

Kомпакт-дискот е објавен со финансиска поддршка од Министерството за култура и со поддршка од СОКОМ, МРТ и „Балкан Мјузик Форум“. Фотографиите се на Маја Аргакиева, а дизајнот на „Графосет ДЛ“.

– Особено сум благодарна на сите изведувачи кои се дел од албумот, бидејќи без нивната поддршка немаше да заживее музиката, ниту ќе се реализираше едно вакво издание кое е своевиден авторски архив и нешто што ќе остане. Напредокот во дистрибуцијата на дигитална музика ја направи независната музика достапна за многу поширока публика, но тоа не значи дека треба да замре издавањето на компакт дискови и винили – истакнува Пандевска.

Композиторката Ана Пандевска (1985) своето образование го започнува многу рано и уште како средношколка има двомесечен престој во САД. Тоа на извесен начин ја предодредува нејзината иднина. Студира композиција на ФМУ во Скопје, во класите на професорите Гоце Коларовски и Јана Андреевска, каде што дипломира во 2010 година. Во своите многубројни композиции Пандевска се претставува како автор кој преферира полистилистика и мултижанровност, и кој ниту има комплекс ниту, пак, посебно преферира кој и да е стил што ја обележал музичката историја. Оттаму и нејзиниот интерес за фолклорот, за џезот, последниве години – за електроакустична музика, како и за многу други стилски и изразни насоки, бележи музикологот Марко Коловски во дел од текстот објавен на кориците на првиот авторски компакт-диск на Ана Пандевска.