Проблемот со јавниот превоз во Скопје е „горлив и сериозен“ затоа што „особено ги засега средношколците, правејќи го секојдневното патување до училиштата низ градот сè потешко“ велат од Сојузот на средношколци и најавија дека ќе се приклучат на протестот кој ќе се одржи попладнево за состојбата со јавниот превоз и недостиг на автобуси во Скопје.

-Протестот ќе почне во 14 часот пред старата Пошта во Скопје, по што учесниците ќе се упатат кон Град Скопје, каде што протестот ќе продолжи од 14:30 часот. Како млади луѓе кои директно се засегнати, бараме итни и одржливи решенија за враќање на јавниот превоз и обезбедување еднаков пристап до образование за сите ученици – велат од Сојузот.

Во дописот додаваат и дека остануваат посветени на застапување на правата и потребите на учениците и обезбедување гласот на средношколците да биде слушнат за прашања кои го засегаат образованието и секојдневниот живот.