Полските безбедносни сили денеска со поддршка на воени авиони од своите сојузници во НАТО соборија сомнителни беспилотни летала за кои потоа открија дека се од руско производство, што е првпат членка на западниот воен сојуз да испукала куршуми за време на војната во Украина.

Полскиот премиер Доналд Туск изјави пред парламентот дека ова е „најблиску што сме биле до отворен конфликт од Втората светска војна“, иако рече дека „нема причина да верува дека сме на работ на војна“.

Полски борбени авиони Ф-16, холандски Ф-35, италијански авиони за надзор АВАКС и авиони за полнење гориво на НАТО се упатија во операција за соборување на беспилотни летала што почнаа да влегуваат во полскиот воздушен простор во вторник навечер и продолжуваа да пристигнуваат до утрото, соопштија официјални лица.

НАТО: Рускиот упад во полскиот воздушен простор не се третира како напад

Еден дрон се урна во двокатната куќа од тули на пензионерот Томаш Весоловски во источното полско село Вирики-Вола во 6:30 часот наутро додека тој седел дома гледајќи вести за упадот на телевизија.

Москва досега негира одговорност за инцидентот, а висок дипломат во Полска рече дека беспилотните летала дошле од правец на Украина, пренесува Ројтерс.

Руското министерство за одбрана соопшти дека нејзините беспилотни летала извршиле голем напад врз воени објекти во западна Украина, но не планирале да погодат никакви цели во Полска.

Руската армија тврди: Дострелот на беспилотните летала што наводно ја преминале полската граница не надминува 700 км

Лидерите на Франција, Велика Британија, Германија и Канада беа меѓу лидерите на НАТО кои остро го осудија руското навлегување.

Немаше веднаш соопштение од Вашингтон. Генералот на американските воздухопловни сили, кој е врховен командант на НАТО, Алексус Гринкевич, рече дека алијансата „реагирала брзо и решително на ситуацијата, демонстрирајќи ја нашата способност и решителност да ја браниме сојузничката територија“.

Европските лидери, кои во последно време се обидуваат да го убедат американскиот претседател Доналд Трамп да им се придружи во заострувањето на санкциите кон Русија и зголемувањето на поддршката за Киев, рекоа дека тоа оправдува колективен одговор.

Полска соопшти дека 19 објекти влегле во нејзиниот воздушен простор за време на големиот руски воздушен напад врз Украина и дека ги соборила оние што претставувале закана.

Туск го нарече инцидентот „провокација од големи размери“ и рече дека го активирал Членот четири од договорот на НАТО, според кој членовите на алијансата можат да бараат консултации со своите сојузници.

Андреј Ордаш, вршител на должноста амбасадор на Русија во Полска, беше цитиран од државната новинска агенција РИА дека обвинувањата за упад се „неосновани“ и рече дека Полска не дала никакви докази дека соборените дронови се од руско потекло.

Кремљ одби директно да коментира за инцидентот, но портпаролот Дмитриј Песков рече дека ЕУ и НАТО „ја обвинуваат Русија за провокации секојдневно. Поголемиот дел од времето без дури и да се обидат да презентираат барем некаков аргумент“.

Неколку полски аеродроми беа привремено затворени, вклучувајќи го и оној што се користи како главна точка за пристап за западните претставници и залихите што патуваат до Украина по копно.

Шефот на НАТО, Марк Руте, изјави дека сè уште не е направена целосна проценка на инцидентот, но додаде дека „без разлика дали бил намерно или не, тој е апсолутно неодговорен, апсолутно опасен“.

„Војната на Русија ескалира, не завршува. Мораме да ја зголемиме цената за Москва, да ја зајакнеме поддршката за Украина и да инвестираме во одбраната на Европа“, изјави највисоката дипломатка на ЕУ, Каја Калас.

Првичните индикации укажуваат дека влегувањето на руски беспилотни летала во европскиот воздушен простор било намерно, а не случајно, додаде таа во својот пост на Икс.

Украинскиот претседател Володимир Зеленски изјави дека Русија употребила 415 дронови и 40 ракети во нападите врз Украина во текот на ноќта, додавајќи дека најмалку осум дронови „шахед“ од иранско производство биле насочени кон Полска.

„Исклучително опасен преседан за Европа. Потребен е силен одговор – и тоа може да биде само заеднички одговор од сите партнери: Украина, Полска, сите Европејци, САД“, рече тој.

Русија долго време изјавува дека нема намера да поттикнува војна со НАТО и дека западноевропските земји кои сугерираат дека таа е закана се обидуваат да ги влошат односите.

Претседателката на Европската комисија, Урсула фон дер Лајен, повика на повеќе санкции кон Русија и рече дека ЕУ подготвува санкции за танкерите што транспортираат нејзина нафта и трети земји што ја купуваат.