Од жената земјоделка се бара да биде сопруга, мајка, да се грижи за родителите, да „аргатува“ на нивите, да знае да управува со трактор и комбајн и да произведува храна, не само за своето семејство, туку и за државата. Арно ама овој синџир се повеќе се тенчи, бидејќи ниту една мерка која наводно се презема за подобрување на статусот на руралната жена, не е правилно насочена, подвлекува Максим Ацевски, главен држав ревизор, сублимирајќи ги наодите од регионалната анализа за родова еднаквост на жените од руралните средини.

Од наодите на ревизијата, која освен во нашата земја е спроведена и во Албанија, може да се види дека нема никаква анализа за плановите да се инвестира во детски градинки во македонските села, ниту пак се предвидува изградба на домови за стари лица, а не може ни да се утврди колку жени од руралните средини ги користеле мерките за вработување и за обука.

Единствено, позитивно е тоа што во 2023 година стартуваше породилниот надоместок за жените земјоделки, кој придонесе за каква, таква социјална сигурност за нив.

-Депопулацијата и ограничените можности на жителите од руралните средини се евидентни секој ден, а улогата на руралната жена која е клучна за опстанокот на селата е невидлива и непрепознатлива. Статистичките податоци се поразителни – 205 населени места во земјава се без ниту еден жител, а – 218 се со помалку од 10 жители. Не смееме да дозволиме да ја изгубиме руралната жена и да ја претвориме во индустриски работник, кој патува во градот и да работи зад машините. Нејзината вистинска улога е да произведува храна, која не само што ќе го прехрани нашето население, туку и ќе извезува квалитетни земјоделски производи. Од сето ова е јасно зошто ни се случуваат ценовни шокови и јадеме прескапа храна – нема кој да произведува и да ги обработува нивите – поентираше Ацевски.

Ревизорите констатирале дека тековните мерки за афирмативна акција во однос на поддршката на жените во руралните средини не се ефективни, а најголемо влијание за тоа има условот тие да се сопственик на земјиште од три до пет години.

-Која жена која почнува бизнис на село би се пријавила за било каква мерка за да го унапреди своето работење со таков услов – прашуваат ревизорите?

Стереотипите и дискриминацијата мора да бидат елиминирани,а извршната и законодавната власт мора да обезбедат услови за непречено вклучување на руралната жена на пазарот на трудот.

-Жените земјоделки можат и знаат како да ја осигураат својата иднина, да стане успешен претприемач, да изгради подобро утре за себе, за своето семејство и за целокупниот општествен поредок – велат експертите.

Според податоците од ДЗС за 2022 година, дури 13.451 жена била неплатен семеен работник, 6.126 жени биле вработени за своја сметка, само 1.113 се водат како газди, а 78.142 жени се вработени во селата.