ЕСМ работи со загуби, бидејќи продажната цена на струјата е пониска од производствената, што според бизнис-логиката не е одржливо. Сепак, министерката за енергетика, Сања Божиновска, во вечерашното гостување во „Топ Тема“ на „Телма“ изјави дека „со домаќинско работење и вложување во обновливи извори на енергија, може да се постигне промена“.

„ЕСМ е столбот на нашата енергетика. Нема да се фокусираме само на РЕК, туку ќе го зголемиме производството преку нови обновливи извори и ќе ги намалиме трошоците,“ рече Божиновска.

Министерката вели дека енергетиката не се планира од денес за утре и дека енергетската стратегија треба да се спроведува постепено. Таа додаде дека сите институции треба транспарентно да ги информираат граѓаните за своите активности, инвестиции и проекти.