Новогодишната песна „Бушава Нова година“, која го најавува враќањето на образовно-забавниот бренд „Бушава азбука“, е дел од новата серија „Буквождер“, анимирано продолжение и приказна за буквите и за македонскиот јазик од легендарната телевизиска серија „Бушава азбука“.

Анимираната песна „Бушава Нова година“ е создадена како копродукција помеѓу „2БА (Втора ’Бушава азбука‘) продукција“, „Види Вака – раскажувачко студио“ и режисерот Георги М. Унковски. „Бушава Нова година“ ја пеат хероите од „Буквождер“, Бушавковци, чии гласови ги позајмуваат Ивана Павлаковиќ, Ангела – Александра Ивановиќ и Дамјан Цветановски. Музиката е на Георги Шарески, текстот на Мите Кузевски, а во адаптација помогнаа Горан Игиќ и Георги Шарески.

Креативни продуценти се режисерот Слободан Унковски и актерката Синоличка Трпкова, додека извршни продуценти се Горан Игиќ и Мите Кузевски. Режисер и продуцент на анимираната серија е Георги М. Унковски, а сценариото е на Калија Киселичка.

Во анимацијата се користени оригиналните илустрации на Душан Петричиќ од 1985 година, за кои копродуцентите ги имаат откупено сите права, како и адаптации и нови илустрации од илустраторот на „Буквождер“, Томи Џуровски. Анимацијата на спотот за песната и анимацијата на новата серија се дело на Никола Димов, Дамјан Mихаилов и Горан Менков.

По двегодишни напори за обезбедување поддршка и спонзори, овој прв проект од „Бушав универзум“ е финансиран од сопствени средства на копродуцентите. Во план е и јавна кампања за собирање средства. Со оваа анимирана серија, чие емитување се очекува во 2025-та година, започнува новата етапа на „Бушава азбука“ и „Бушав универзум“ во Македонија, но и секаде каде што се присутни македонскиот јазик и култура.

Во меѓувреме, седум години траат напорите за финансирање на „Бушав буквар“, продолжение на легендарната телевизиска серија „Бушава азбука“ за која Горан Стефановски ги почна, а по неговата ненадејна смрт Марјан Алчевски ги доврши сценаријата. За овој проект од национален интерес копродуцентите, исто така, ги имаат обезбедено сите права. Серијата за која институциите се глуви од 2018-та година е воедно и последното нереализирано дело на легендарниот македонски драматург Горан Стефановски.

Идејни творци на проектот се режисерот Слободан Унковски и актерката Синоличка Трпкова Меллес, кои беа дел од оригиналната постава на омилената „Бушава азбука“. Повеќе детали за „Буквождер“, „Бушав буквар“ и како е замислен „Бушав универзум“ копродукцијата ќе соопшти во 2025-та година.