Камерниот оркестар „Скопски солисти“ бележи значаен јубилеј, 25 години континуирана уметничка дејност, што ќе го одбележи со концерт на 8 април, во камерната сала на Филхармонија, под диригентската палка на Виктор Митревски, со настап на солистот Борис Трајанов и со дела од Вивалди, Чајковски, Верди, Херберт, Сибелиус, Барток и два македонски бисера. Уметнички раководител на камерниот оркестар „Скопски солисти“ е проф. м-р Васил Атанасов.

Што значи за оркестарот да се опстои 25 години на музичката сцена?

– Јубилејот за камерниот оркестар „Скопски солисти“ претставува огромен успех и за работата и за опстојувањето во овие турбулентни времиња. Започнавме со голем ентузијазам и желба да направиме убав и квалитетен камерен состав, по примерот на слични состави од регионот, каде што има спој на квалитет, искуство и младост.

Не беше лесно на самиот почеток, бидејќи почнавме од нула, што се вели. Требаше да се направи добар состав на членови на оркестарот, избор на програма со дела за камерен оркестар, содржина од различни епохи и според почетните можности на оркестарот, а секако и да се обезбедат нотни материјали, партитури, простор за нормална работа.

Во почетокот работевме само оркестарски уметници без диригент, за подоцна, кога стекнавме добра подготовка и програма, почнавме соработка со најдобрите македонски диригенти. На речиси секој настап се трудевме да имаме разновидна стилска програма од различни епохи и секогаш да имаме изведба на ново дело, што беше предизвик за сите нас.

Во изминативе дваесет и пет години со „Скопски солисти“ продефилираа плејада познати македонски уметници, членови на камерниот оркестар, но и врвни македонски инструменталисти кои првите чекори ги направија во нашиот оркестар и имаа одличен развој, за подоцна да станат одлични оркестарски уметници, а дел од нив и водачи на секции во македонската филхармонија и опера.

Покрај многубројните солисти, соработувавме и со најквалитетните хорови кај нас, како хорското студио „Рустико“, женскиот хор „Св. Злата Мегленска“ и женскиот хор „Менада“. Сите овие години соработувавме со истакнатите диригенти Александар Лековски, Саша Николовски Ѓумар, Борјан Цанев, Ле Фи Фи, Запро Запров, Бисера Чадловска, Иван Еминовиќ, Виктор Митревски и гостите маестро Андреј Андреев од Бугарија, кој беше и шеф-диригент во два мандата, Алесандро д’Агостини од Италија и др. Имавме настапи на многу манифестации и настани во земјава и гостувања во странство, во Бугарија и во Србија.

Каква програма подготвивте за јубилејниот концерт на 8 април во камерната сала на Македонска филхармонија?

– За нашиот јубилеј подготовките почнаа уште претходната година, во смисла да се одлучиме за избор на солист и диригент достојни за нашиот јубилеј. Изборот падна на маестро Борис Трајанов, заслужен уметник на Македонија и уметник на УНЕСКО, солист на МОБ и истакнат професор и педагог. Тој со задоволство ја прифати поканата и предложи убава и допадлива програма со арии и две македонски теми, познатите фолклорни бисери „Си заљубив“ и „Кога падна на Пирина“, предлози што ги прифативме со задоволство. Потоа се договоривме и со маестро Митревски за програма со Чајковски, Вивалди, Сибелиус и Барток , а маестро даде предлог и за изведба на две пиеси од В. Херберт, што ќе биде нивна премиерна изведба.

Во каков состав сега функционира оркестарот и на кој начин успевате да ја одржите неговата активност?

– Оркестарот во сегашниот состав функционира како гудачки камерен оркестар повремено дополнувајќи го со Скопскиот дувачки квинтет. Во изминатите години имаше периоди кога имавме повеќе активности во зависност од поддршката од Министерството за култура, како традиционалниот Божиќен концерт, кој го одржувавме петнаесет години во Универзална сала и кој стана културно наследство со поддршка од некои спонзори кои имаа сенс за уметност, посебно во делот на реализацијата на нашите три компакт-дискови во овие изминати години. Можноста за изведба на нови дела, нови автори, ентузијазмот и желбата за натпревар ни даваше огромна сила да истраеме и опстанеме на ветрометината на уметноста сите овие години.

(Текстот е објавен во „Културен печат“ број 275, во печатеното издание на весникот „Слободен печат“ на 5-6.4.2025)