Со инвестиции во патната и во уличната инфраструктура надлежните од Општина Аеродром најавуваат дека ќе го решаваат недостатокот на паркинг-места во урбаното јадро на општината за што, како што објаснуваат оттаму, во буџетот за следната година за оваа намена планирани се 30 милиони денари.

– Во рамките на градежната офанзива што почна оваа есен и ќе трае во текот целата 2023 година се грижиме граѓаните во сите делови од Аеродром да добијат нови улици, пешачки патеки и паркинзи – стои во објавата на локалната самоуправа.

Инаку, сè со цел подобрување на условите за живот на граѓаните од Општина Аеродром, од локалната самоуправа најавуваат и дека интензивно ќе работат на продолжување на реализацијата на почнатите проекти од минатата година и ќе започнат со реализација на нови развојни проекти креирани според барањата на граѓаните.

– Хуманата урбанизацијата преку бришење маркички за згради и нивно пренаменување во зелени површини и површини поврзани со едукација, кратење на непродуктивните трошоци, создавање транспарентна општина која е сервис на граѓаните, проекти за младите и враќањето на кошаркарскиот клуб МЗТ Скопје во АБА1 лигата, се само дел од проектите што се реализираа во Аеродром минатата година – истакна градоначалникот на Општина Аеродром Тимчо Муцунски на настан во чии рамки беа презентирани реализираните проекти за 2022 година и најважните приоритети за следната 2023 година.
Меѓу другото, од локалната самоуправа најавуваат дека досегашната динамика на работа продолжува и следната година.

Изградба на нови градинки, капитални и зелени проекти, училишта, плоштади, паркови и сообраќајници, инвестиции во спортот и младите, субвенции за ранливите категории граѓани и ефикасното и транспарентно работење, се само дел од проектите кои градоначалникот Муцунски ги најави во своето обраќање.

– Ефикасноста и транспарентноста остануваат приоритети на актуелната администрација во Општина Аеродром. Во 2023 година и понатаму ќе го имплементираме проектот за нула корупција, ќе биде година во која ќе продолжи домаќинското и одговорно работење, а трошоците за репрезентација како и досега ќе останат „0 денари“ – истакна првиот човек на Општина Аеродром додавајќи меѓу другото дека и во следната календарска година тие како локална самоуправа ќе водат сметка за секое населено место во Аеродром.