Француската полиција случајно пронашла биста на Џим Морисон, украдена во 1988 година од гробот на култниот фронтмен на групата „Дорс“ на гробиштата Пер-Лашез во Париз, јави „Јуроњуз“.

Импресивната биста на Морисон, дело на хрватскиот уметник Младен Микулин, била украдена од париските гробишта пред цели 37 години. Таа била изработена од Микулин по повод десетгодишнината од смртта на Џим Морисон во 1981 година. Полицијата ја пронашла исчкртаната и оштетена скулптура за време на претреси во рамките на истрага поврзана со измама.

Според официјалната верзија, Морисон починал во када, на 27-годишна возраст, од срцев удар во јули 1971 година.

Францускиот новинар Сем Барнет во книга од 2007 година тврдеше дека блиските пријатели и семејството ја искривиле официјалната верзија за смртта на Морисон за да го „исперат“ неговиот углед и дека ненадејната смрт на уметникот всушност била резултат на предозирање со хероин во тоалетот на парискиот ноќен клуб „Рокенрол Циркус“.

Во 1991 година, на 20-годишнината од смртта на пејачот, на неговиот гроб избувнаа немири, поради што гробиштата беа принудени да ангажираат дополнително обезбедување. По ова, на гробот на Морисон бил трајно поставен стражар.

Точните околности на смртта на пејачот сè уште се обвиени во мистерија, а повеќето првични извештаи велат дека починал од срцев удар во кадата. „Дорс“, формирани во Лос Анџелес, биле меѓу највлијателните рок групи од крајот на 1960-тите и почетокот на 1970-тите.