Германскиот обвинител кој го истражува исчезнувањето на девојчето од Британија Медлин Мекен изјави дека во моментов нема изгледи за покренување обвинение против главниот осомничен во случајот, објави денеска Скај њуз.

Кристијан Брикнер беше формално прогласен за осомничен во 2020 година во случајот со Медлин Мекен, која исчезна од хотелската соба во Португалија каде што престојуваше со своето семејство во 2007 година. Тој негира каква било вмешаност.

Брикнер, кој е осуден за трговија со дрога и сексуална злоупотреба на малолетник, отслужува седумгодишна затворска казна во Германија за силување жена во регионот Алгарве од каде исчезна девојчето. Неговата казна завршува во септември 2025 година.

Во октомври, Брикнер беше ослободен од германскиот суд од неповрзани обвиненија за силување и сексуална злоупотреба на деца, што ја зголеми можноста тој да биде ослободен од затвор оваа година.

„Во моментов нема изгледи за покренување обвиненија во случајот на Менди“, рече германскиот обвинител Хан Кристијан Волтерс во денешното интервју што го пренесе Скај Њуз. Тој додаде дека како што сега стојат работите, Брикнер ќе биде ослободен на почетокот на септември.

Мекен, која тогаш имала три години, исчезнала од својата хотелска соба во португалското одморалиште Плаја да Луз каде што била на одмор со своите родители, додека вечерале со пријателите во близина.

Нејзината судбина оттогаш остана непозната и нејзиното тело не е пронајдено.

Германската полиција во јуни 2020 година објави дека Мекен се смета за мртва и дека Брикнер, кој сега има 40 години, е веројатниот виновник.

Обвинителот рече дека ќе побара нов налог за апсење на Брикнер за да го задржи во затвор по септември. Еден од адвокатите на Брикнер, цитиран од Скај њуз, рече дека неговиот тим за одбрана ќе се спротивстави на таков потег.