Во издание на „Просветно дело“ објавена е сликовницата „Добриот цар и храброто момче Давид“ на авторката Милена Лунеска. Книгата носи приказна за добрината, храброста и за моќта на надежта што нè потсетува дека вистинските херои се оние коишто и покрај стравот, се борат за она што е праведно и исправно. Тоа е приказна за борбата меѓу светлината и темнината, за тоа како храброста и добрината можат да го променат светот.

Со луциден и мудар текст на интересната и динамична приказна обликувана со извонреден дизајн, книгата е инспиративно четиво за секое дете. Основните пораки во сликовницата се однесуваат на вистинските човечки вредности, како што се добрината, емпатијата, храброста, радоста со намера да се докаже дека во борбата со лошото, добрината и храброста секогаш се победници.

Авторката Милена Лунеска е родена во Кичево, во 1963 година. По професија е економист и многу години беше раководител на сопствена фирма. Пишува проза и поезија. Авторка е на романите „Два часа“, „Исчистени души“, „Ќерката на премиерот“ и „Добро утро, љубов!“, објавени за различни издавачки куќи.

Секоја книга е со различна животна тема, емотивно и врвно писателски раскажана, па од тие причини на читателот му станува разбирлива, непосредна и блиска. Нејзината петта книга беше стихозбирка „Љубов облечена во бело“, објавена од „Арс Ламина“. Книгата „Добриот цар и храброто момче Давид“ е нејзина прва сликовница.

(Текстот е објавен во „Културен печат“ број 278, во печатеното издание на весникот „Слободен печат“ на 26-27.4.2025)