Антикорупциската комисија, слично како и за директорот на Агенцијата за национална безбедност, Бојан Христовски, само сега на затворена седница, ја запре постапката против заменик-директорката на Агенцијата за разузнавање, Ивана Стојановска, која беше отворена уште во јули минатата година, со образложение дека и Јавното обвинителство отворило предмет против Стојановска со исти наводи дека доставила лажна биографија и фалсификувани документи.

-Постапката по предметот оформени по пријави од непознат сторител се запира од причина што по пријава со исти наводи постапува надлежното јавно обвинителство и поради тоа ДКСК нема основ за натамошно постапување. Пријавата и прилозите да се достават до надлежното основно јавно обвинителство. Предметот со број 12-1859/1 од 2024 година да се архивира – одлучиле членовите на ДКСК на затворената седница за јавноста поради калсифицираните информации што ги достави АР за директорката Стојановска.

Од одлуката што ја објави ДКСК, првата пријава до Комисијата била поднесена на 2 јули минатата година. Пријавата е од непознат подносител со наводи дека Стојановска не ги исполнувала условите за вршење на функцијата.

-Според информациите со кои располагал подносителот на пријавата, Претседателката на државата била доведена во заблуда поради тоа што наведеното лице доставило лажна биографија и фалсификувани документи. Врз основа на пријавата во ДКСК е оформен предмет – пишува во дел од одлуката.

ДКСК пред одлука за заменичката на АР – дали часовите по информатика можат да бидат разузнавачки стаж?

Но, освен оваа пријава, исто како и за Христовски, за кого имаше вкупно девет поднесени пријави до ДКСК, за Стојановска биле поднесени уште седум пријави, последната на 18 февруари. Овие пријави биле со слични наводи, дека претседателката со именувањето на заменик-директорот го прекршила Законот за Агенција за разузнавање и барање да се утврди какви податоци презентирала таа и дали претседателот ја знаел фактичката состојба пред да ја донесе одлуката или свесно го прекршила Законот.

Но, освен ова, во пријавите се барало и да се утврди дали лице од политичка партија влијаело при нејзиниот избор, со оглед на тоа дека во јавноста излегоа фотографии на кои Стојановска е сликана со високи функционери од владејачката партија.

Дали имало партиско влијание?

„Од Државната комисија се бара да утврди и дали имало влијание при избор од политичка партија или лице кое настапува во име на политичка партија во смисла на членот 39 од Законот за спречување на корупцијата и судирот на интереси“

Но, за ова барање дали при изборот на Стојановска имало партиско влијание, Комисијата се прогласила за ненадлежна.

-Државната комисија цени дека со цитираната законска одредба е воведена општа забрана за политичко влијание или избор, именување, или разрешување на лице на службена раководна или друга функција или должност, со исклучок за случаите во кои со закон е определена надлежност на претседателот на Републиката Собранието и владата или органите на локалната самоуправа да вршат избор именување или да даваат мислење или согласност. Исклучокот се однесува за наброените органи кои по својата природа и состав се политички. ова подразбира дека со оваа одредба не е опфатен предметниот случај о кој се работи за именување од надлежност на претседателот. Во секој случај со споменатата одредба не е конституирано никакво надлежно постапување од ДКСК по поднесени пријави туку законот гарантира судска заштита на лицето кое смета дека е оштетено со актот на именување извршено под политичко влијание – се вели во одлуката на Комисијата.

За да ја утврди фактичката состојба Комисијата упатила барања за доставување на податоци и информации до претседателката, до Агенцијата за разузнавање и до Американскиот универзитетот на Европа – ФОН.

Според одговорот, документацијата и досието за предметното именување, според ДКСК, се потврдило дека Стојановска ги исполнува условите предвидени во членот 9 од Законот за Агенцијата за разузнавање во којшто се наведени условите што треба да ги исполнува лицето кое се именува за Заменик директор на АР, меѓу кои и да има најмалку десет години работно искуство од областа на безбедноста, одбраната или надворешната политика, од кои пет години на раководно место во Агенцијата.

За Стојановска спорно е дали го исполнува условот од десет години работно искуство од областа на безбедноста, одбраната или надворешната политика затоа што таа работела како асистентка која држела предмети од областа на информатиката на приватниот Универзитет.

Универзитетот ја известил Комисијата дека Стојановска била редовно вработена со полно работно време од 2007 до 2014 година и дека додека била вработена на Универзитетот била ангажирана како асистент за Програмирање С, Принципи на логички дизајн и дискретни автомати, Објектно ориентирано програмирање, Компјутерски компоненти, Софтверско инженерство, Објектно ориентирана анализа и Теорија на игри.

ДКСК го затвори за јавност предметот за заменичката на АР – претседателката во одбрана на директорките

-Покрај ангажманот на Факултетот за информатика, именуваната била работно ангажирана како асистент и на Факултетот за детективи и безбедност, по предметот: Применета информатика и на Факултетот за политички науки и меѓународни односи, Факултетот за правни науки и Факултетот за економски науки, по предметот: Е-општество- стои во одлуката.

Експерт за „теорија на игри“

Но, откако ги собрала овие документи, ДКСК добила информација од Скопското обвинителство дека е оформен предмет по доставена кривична пријава за именувањето на заменик директор на Агенцијата, со наводи со иста содржина како и во пријавите доставени до Државната комисија.

Иако предавала предмети кои не се поврзани ниту со сајбер безбедноста, од Кабинетот на претседателката тврдењето го образложуваат со тоа што во Законот стои „најмалку десет години работно искуство од областа на безбедноста, одбраната или надворешната политика“ односно тоа што Законот, според кабинетот, не го ограничува кандидатот во поглед на академското искуство, ниту бара само работно искуство во институции поврзани со безбедноста, одбраната или надворешната политика туку се бара искуство од областа на безбедноста, одбраната и надворешната политика.

– Впрочем, Факултетите за безбедност и политички науки обучуваат кадри за институции што работат во безбедносниот сектор – велат од Кабинетот на претседателката за „Слободен печат“.

Како аргумент на своја страна го ставаат тоа што Стојановска била асистент од 2007 до 2014 година по информациски технологии и специфичните предмети на Факултетот за детективи и безбедност што, според нив, е релевантно искуство од областа на безбедноста и надворешната политика, иако таму предавала Применета информатика и Е-општество.

Но, Антикорупциска комисија не стигнала да побара податоци од Агенцијата за вработување за работниот стаж на Стојановска.

„Слободен печат“ испрати прашања до основното јавно обвинителство кога е оформен предметот за Стојановска и што точно се истражува, но одговор не добивме.

Во Обвинителството се води постапка и за директорот на АНБ, Христовски откако и за него Антикорупциска го затвори предметот и го архивираше. Антикорупциска утврди дека Христовски е именуван за директор на АНБ законски, со исполнување на сите предвидени услови во членот 10 од Агенцијата за национална безбедност.
ДКСК рече дека нема надлежност да утврдува дали некој документ е фалсификат или не, ниту ТОЕФЛ сертификатот за познавање на англиски јазик, ниту дипломата од Економскиот факултет при Универзитетот за туризам и менаџмент во Скопје. неговиот сертификат сега го истражува обвинителството, но со месеци чека повратен одговор од бугарските колеги.