Премиерот Христијан Мицкоски рече дека поминало времето кога јавната администрација била сведена на политички плен и кога владеела партизација, реваншизам и клиентелизам. Тој на денешниот настан „Инвестиција во административните службеници е инвестиција во иднината на јавниот сектор“, порача дека администрацијата ќе се трансформира во професионален и ефикасен сервис на граѓаните.

Тој ја обвини претходната влада дека оставила демотивирани службеници со нарушена доверба, кои со години чекале за соодветни системи за обука.

„Да се потсетиме каде бевме: неодамна, јавната администрација беше сведена на политички плен. Наместо развој – партизација. Наместо мотивација – страв и реваншизам. Наместо обука – клиентелизам. Тоа време заврши. Ние сме генерацијата што ја презема иницијативата и сака да ја донесе Европа дома – преку современ јавен сектор. Времето на Македонија е сега. Мора да ја извлечеме државата од мракот на партизацијата и да ја однесеме во светлината на европската иднина“, рече Мицкоски.