Проблемите со собирање отпад, особено на кабастиот отпад се најчестите причини поради кои скопјани се јавуваат на дежурниот телефон на ЈП „Комунална хигиена“.

Во првите шест месеци од годината на бројот 02 3216 644 се регистрирани вкупно 574 јавувања од граѓани поврзани со различни услуги кои ги нуди претпријатието. Од нив, најголем дел се однесувале на проблеми и прашања поврзани со собирањето на отпадот од пластичните канти поделени во индивидуалните домаќинства, дури 206 јавувања, а имало и 167 повици за услугата за собирање кабаст отпад од домовите на граѓаните.

Од претпријатието тврдат дека веднаш се постапува за да се излезе во пресрет на барањата на граѓаните.

Процедурално се одговара на сите јавувања на дежурниот телефон, а истите веднаш се проследуваат и до соодветните сектори во Претпријатието каде што се постапува согласно наведениот проблем – велат од „ЈП „Комунална хигиена“.

Во истиот период, 20 граѓани се јавиле за да пријават мрши од умрени животни на јавни површини, по што од екипите на претпријатието ги подигнало од јавните површини. Телата на умрените животни со специјално возило се транспортираат до депонијата „Дрисла“, каде што се одлагаат во посебна јама за оваа намена.