Акциите на Фејсбук денес пораснаа за речиси пет отсто, само еден ден откако социјалната мрежа извести за трет последователен раст на кварталните приходи и зголемување на бројот на корисници на некои од своите најпрофитабилни пазари, пренесе „Ројтерс“.

Извештајот за резултатите на Фејсбук наиде на различен прием меѓу аналитичарите на Волстрит, пришто најмалку девет од нив ги подигнаа своите тартетирани цени по акција на компанијата, а најмалку пет аналитичари ја спуштија целната цена.

Акциите на Фејсбук, според последните податоци од берзата, пораснаа за 4,8 отсто на 197,27 долари, што се уште е за 22 отсто пониско од медијалната таргет-цена на аналитичарите од 240 долари, пренесува „Ројтерс“. Доколку акциите на Фејсбук ја задржат оваа добивка до крајот на денешната трговска сесија, компанија од Силиконската долина за само еден ден на берзата може да заработи речиси 26 милиони долари.

Фејсбук, кој е втор најголем светски продавач на огласен простор на интернет, соопшти дека неговите приходи во четвротото тромесечие поспоро растат, приближно за 20 до 25 отсто, во дел поради изборот на корисниците да ја ограничат можноста на компанијата целно да им испраќа реклами користејќи ги нивните лични податоци.