Во просториите на „Аудиокултура“ на 2 декември се одржа промоција на книгата „Прес енд плеј“ (Press & Play: Reloaded) на музичкиот новинар Ненад Георгиевски.

Книгата на Ненад Георгиевски ја претставува македонската музичка сцена преку серија рецензии и текстови напишани во период од 20 години, а објавени во странски публикации, како „All About Jazz“, и во „Vintage Cafe“. Станува збор за збирка од авторски текстови, кои даваат детален увид во креативните активности на македонските музичари и нивните дела. Книгата за првпат беше објавена во јули 2020 година и ова е второ, дополнето издание, а објавена е на англиски јазик.

Публикацијата се состои од рецензии на албуми, на концерти и на фестивалски настапи на разни изведувачи, меѓу кои: Влатко Стефановски, „Леб и сол“, Кирил Џајковски, „Фолтин“, Џијан Емин, Гоце Стевковски, Националниот џез-оркестар, Џон Апелгрен, Зоран Маџиров, „Анастасија“, „Чалгија саунд систем“, „Проект Жлуст“, Сашо Поповски, „Стринг форсис“, „Љубојна“ и многу други, на фестивали како Скопскиот џез-фестивал, „Оф-фест“, или на концерти на македонски изведувачи во држави како Србија, Хрватска, Грција, САД. Тука се и критичките осврти за видеоизданија, како и за книги од визуелните уметности, како „Џезтетика“ на Татјана Ранташа или „Cloud Arrangers“ на Жига Коритник. Промотор на книгата беше проф. д-р Милан Дамјаноски.

– Како музички новинар и критичар, Ненад Георгиевски веќе подолго време вредно и посветено работи на „исцртувањето“ на рамката во која комуницира домашната и светската култура на овие простори. Сите негови рецензии и интервјуа, кои веќе речиси две декади ги објавува за домашни и странски реномирани медиуми, се еден вид на поединечни скици и портрети, но кои добиваат (и ќе добиваат и во иднина) своја заокружена форма со тоа што тој ги собира и објавува во форма на книги – потенцираше Дамјаноски.

Новинарот Ненад Георгиевски, кој е добитник на државната награда за публицистика „Мито Хаџивасилев – Јасмин“ за 2023 година, е автор на уште четири книги од областа на публицистиката („Музика и муабети“, „Уште музика и муабети“, „Уште музика, уште муабети“ и „Ретки птици“). Издавач на книгата е „Номад-Арт Скопје“, а идејното решение на дизајнот е на Билјана Билбилоска.

(Текстот е објавен во „Културен печат“ број 259, во печатеното издание на весникот „Слободен печат“ на 7-9.12.2024)